جہلم شہر بھر میں عشرہ محرم الحرام انتہائی مذہبی عقیدت و احترام کے ساتھ منایا جا رہا ہے۔
مرکزی امام بارگاہ سول لائن روڈ سمیت شہر کے مختلف مقامات پر مجالسِ عزا کا سلسلہ حسبِ روایت روزانہ کی بنیاد پر جاری ہے، جن میں مختلف زاکرین حضرت امام حسینؓ اور شہدائے کربلا کی قربانیوں پر روشنی ڈال رہے ہیں۔
مجالس کے ساتھ ساتھ لنگر و تبرکات کی تقسیم اور جگہ جگہ ٹھنڈے پانی کی سبیلیں بھی لگائی گئی ہیں، جن سے شہری بھرپور استفادہ کر رہے ہیں۔ شہر کے مختلف علاقوں میں بھی عزادارانِ حسین کی جانب سے لنگر حسینی اور سبیلوں کا خصوصی اہتمام کیا گیا ہے۔
انتظامی صورتحال کا جائزہ لیا جائے تو ضلعی انتظامیہ اور دیگر محکمے بھرپور طور پر متحرک ہیں۔ روزانہ کی بنیاد پر انتظامی افسران امام بارگاہوں اور ماتمی جلوسوں کے روٹس کا معائنہ کر رہے ہیں تاکہ امن و امان برقرار رکھا جا سکے۔
اس سلسلے میں پنجاب پولیس، ریسکیو 1122، محکمہ صحت، سول ڈیفنس، آئیسکو، راولپنڈی ویسٹ مینجمنٹ کمپنی اور میونسپل کمیٹی کے اہلکار و افسران اپنے فرائض ذمہ داری سے انجام دے رہے ہیں، جس کے باعث انتظامات کو شہری حلقوں کی جانب سے سراہا جا رہا ہے۔
