جہلم: جشن عید میلاد النبی ﷺ کے موقع پر خوشیاں منانا ہی کافی نہیں بلکہ اصل مقصد سیرت النبی ﷺ پر عمل کرنا اور حضور اکرم ﷺ کے بتائے ہوئے طریقوں کے مطابق فلاح انسانیت کے لیے کردار ادا کرنا ہے۔اگر میلاد کے جشن کے بجائے اس کے پیغام کو اپنی عملی زندگی میں نافذ کر لیا جائے تو معاشرہ حقیقی معنوں میں تبدیل ہو سکتا ہے۔
یہ بات صدر علماء مشائخ ونگ پنجاب مسلم لیگ ن اور ممبر اسلامی نظریاتی کونسل ڈاکٹر مفتی انتخاب احمد نوری نے کہی۔ وہ ضلعی انتظامیہ جہلم کی جانب سے مقامی ہال میں منعقدہ خصوصی تقریب "پیغام پاکستان اور پیغام رحمت اللعالمین ﷺ” سے بطور مہمان خصوصی خطاب کر رہے تھے۔
تقریب میں ڈپٹی کمشنر جہلم میثم عباس، مختلف مسالک کے علماء کرام، صدر ڈسٹرکٹ بار ایسوسی ایشن، صدر انجمن تاجران، صدر چیمبر آف کامرس سمیت مذہبی و سماجی شخصیات اور طلباء کی بڑی تعداد نے شرکت کی۔
تقریب میں مقررین نے اس بات پر زور دیا کہ میلاد النبی ﷺ کو صرف جھنڈوں، لائٹوں اور تقریبات تک محدود نہ رکھا جائے بلکہ نبی کریم ﷺ کے کردار اور سیرت کو اپنی زندگیوں میں نافذ کیا جائے تاکہ ایک پرامن اور خوشحال معاشرہ تشکیل دیا جا سکے۔
ڈپٹی کمشنر میثم عباس نے اپنے خطاب میں کہا کہ ربیع الاول کا مہینہ تمام مہینوں سے افضل ہے کیونکہ اس میں آقا نامدار حضرت محمد مصطفیٰ ﷺ کی ولادت باسعادت ہوئی، آپ ﷺ تمام عالمین کے لیے رحمت بن کر آئے۔ اس ماہ کو رنگ، نسل اور مسلک کی تفریق سے بالاتر ہو کر عقیدت و احترام کے ساتھ منانا چاہیے۔
کانفرنس میں قاری عمر فاروق، قاری حافظ ظفر اقبال، قاری محمد باسط، علامہ رضا حسنین کاظمی اور دیگر علماء کرام نے بھی خطاب کیا اور شرکاء کو ربیع الاول اور جشن عید میلاد النبی ﷺ کی مبارکباد پیش کی۔
ضلعی انتظامیہ جہلم کی جانب سے اس سلسلے میں مختلف تقریبات کا اہتمام کیا جا رہا ہے تاکہ معاشرے میں محبت، رواداری اور اخوت کے پیغام کو فروغ دیا جا سکے۔
