امیر عبدالقدیر اعوان نے کہا ہے کہ صحابہ کرامؓ وہ عظیم ہستیاں ہیں جنہیں اللہ تعالیٰ نے اسلام کے دفاع اور دین کی حفاظت کے لیے منتخب فرمایا۔ انہی مقدس نفوس کی بے مثال قربانیوں اور اخلاص کے نتیجے میں اسلام اپنی اصل شکل میں آج تک پوری دنیا میں محفوظ پہنچا ہے۔
شیخ سلسلہ نقشبندیہ اویسیہ، سربراہ تنظیم الاخوان پاکستان امیر عبدالقدیر اعوان نے ان خیالات کا اظہار سلسلہ نقشبندیہ اویسیہ کے زیر اہتمام منعقدہ دو روزہ ماہانہ روحانی اجتماع سے خطاب کرتے ہوئے کیا۔ انہوں نے کہا کہ صحابہ کرامؓ نے اپنی جانوں کے نذرانے پیش کر کے اسلام کی آبیاری کی اور دینِ حق کو آئندہ نسلوں تک پہنچایا۔ اگر آج ہم اپنی عملی زندگی میں اسلامی تعلیمات پر عمل نہیں کرتے تو درحقیقت ہم اسی گلستانِ اسلام کو نقصان پہنچانے کا سبب بن رہے ہیں۔
امیر عبدالقدیر اعوان نے کہا کہ غزوہ احد تاریخ اسلام کا ایک عظیم باب ہے، جہاں ایک ہی میدان میں اہلِ ایمان، منافقین اور کفار موجود تھے، مگر اللہ تعالیٰ نے وہ عظیم مقام ان خوش نصیب ہستیوں کو عطا فرمایا جنہوں نے رسول اکرم ﷺ کے حکم پر اپنی جانوں کا نذرانہ پیش کیا۔ انہوں نے کہا کہ صحابہ کرامؓ کی خوشی اور زندگی کا مقصد صرف نبی کریم ﷺ کی رضا اور اطاعت تھا، اسی لیے ان کی قربانیوں کا تذکرہ قیامت تک جاری رہے گا۔
انہوں نے کہا کہ تاریخ کے مختلف ادوار میں صحابہ کرامؓ کی شخصیات پر اعتراضات اٹھانے کی کوششیں کی گئیں، لیکن اللہ تعالیٰ نے ہمیشہ اپنے دین کی حفاظت فرمائی اور کوئی بھی اسلام میں کسی قسم کی تبدیلی یا تحریف نہیں کر سکا۔ انہوں نے کہا کہ صحابہ کرامؓ کی زندگیاں قیامت تک آنے والے مسلمانوں کے لیے مشعلِ راہ ہیں۔
امیر عبدالقدیر اعوان نے موجودہ حالات پر تبصرہ کرتے ہوئے کہا کہ آج امتِ مسلمہ مختلف گروہوں اور اختلافات کا شکار ہے۔ کوئی انصاف کے نام پر ظلم کر رہا ہے تو کوئی انصاف کے مطالبے کی آڑ میں انتشار کو فروغ دے رہا ہے، جبکہ اسلام اتحاد، عدل اور اخوت کا درس دیتا ہے۔
انہوں نے غزوہ احد کے حوالے سے بعض تاریخی تعبیرات پر بھی اظہارِ خیال کرتے ہوئے کہا کہ اس معرکے کو شکست قرار دینا حقائق کے منافی ہے، کیونکہ دشمن اپنے مقاصد حاصل نہ کر سکا اور مسلمانوں کے جذبۂ ایمان اور استقامت نے تاریخ میں ایک لازوال مثال قائم کی۔
یاد رہے کہ سلسلہ نقشبندیہ اویسیہ کے زیر اہتمام ماہِ مبارک ربیع الاول کے دوران "بعثتِ رحمتِ عالم ﷺ” کے موضوع پر ملک بھر میں خصوصی اجتماعات اور پروگرامز منعقد کیے جائیں گے، جن سے امیر عبدالقدیر اعوان خصوصی خطابات کریں گے۔ یہ اجتماعات فیصل آباد، بہاولپور، ڈیرہ نور ربانی کھر، گوجرانوالہ، ہری پور اور مرکز دارالعرفان منارہ میں منعقد ہوں گے۔
تنظیم کی جانب سے عوام الناس کو ان روحانی اجتماعات میں شرکت کی دعوت دیتے ہوئے کہا گیا ہے کہ وہ سیرتِ نبوی ﷺ کی تعلیمات سے فیض یاب ہونے اور اپنے دلوں کو محبتِ رسول ﷺ کی برکات سے منور کرنے کے لیے ان پروگرامز میں شرکت کریں۔
