جہلم/ دینہ: جہلم کی تحصیل دینہ، سوہاوہ اور پنڈدانخان میں عطائی ڈاکٹروں نے ہر گلی محلے میں ڈیرے لگا لیے، تینوں تحصیلوں کے ڈرگ انسپکٹرزاور ہیلتھ کیئر کمیشن کی مبینہ خاموشی نے کئی سوال اٹھا دیے۔
تفصیلات کے مطابق جہلم تین تحصیلوں تحصیل دینہ، سوہاوہ اور پنڈدادنخان میں جگہ جگہ عطائی ڈاکٹرز انسانی جانوں سے کھیلنے میں مصروف ہیں۔ میڈیکل سٹورز پر نشہ آور ادویات،ٹیکے،سیرپ ڈاکٹری نسخے کے بغیرکھلے عام فروخت کیے جارہے ہیں۔
نوجوان نسل تباہی کے دہانے پر پہنچ چکی ہے، ڈرگ انسپکٹراور ہیلتھ کیئر کمیشن کی مبینہ غفلت کے باعث ضلع جہلم کی تینوں تحصیلوں میں جنگل کاقانون نافذ ہے۔ محکمہ صحت کے ارباب اختیار نے شہریوں کو عطائیوں کے رحم و کرم پر چھور دیا ہے۔
ضلع جہلم کی سماجی، رفاہی، شہری تنظیموں نے وزیراعلی پنجاب مریم نواز شریف، چیف سیکرٹری پنجاب اور سیکرٹری ہیلتھ سے نوٹس لینے اور عطائیت کے خاتمے کامطالبہ کیا ہے۔
