سوہاوہ: عالمی شہرت یافتہ سماجی تنظیم مسلم ہینڈز پاکستان نے جہلم کی تحصیل سوہاوہ کے نواحی علاقے ڈومیلی کی ڈھوک خوشحال میں مسجد کی تعمیر مکمل کرنے کے بعد باضابطہ طور پر اس کا افتتاح کر دیا۔
افتتاحی تقریب میں مسلم ہینڈز پاکستان کے ایریا منیجر مرزا کامران، علماء کرام، صحافی برادری، سماجی شخصیات، اور اہل علاقہ کی بڑی تعداد نے شرکت کی۔ تقریب میں محفل میلاد کا بھی اہتمام کیا گیا، جس نے روحانی ماحول کو مزید خوبصورت بنا دیا۔
ڈھوک خوشحال میں نزدیک ترین مسجد نہ ہونے کے باعث اہل علاقہ کو نماز کی ادائیگی کے لیے دور دراز جانا پڑتا تھا۔ اس مسئلے کو مدنظر رکھتے ہوئے مسلم ہینڈز کے ایریا آفس گوجرخان نے چند ماہ قبل مسجد کی تعمیر کا آغاز کیا۔ مسجد کے لیے زمین اہل علاقہ نے فراہم کی، جبکہ تمام تعمیراتی اخراجات مسلم ہینڈز پاکستان نے ادا کیے۔
مسجد کے افتتاح کے موقع پر مسلم ہینڈز کے ایریا منیجر مرزا کامران نے اہل علاقہ کے ساتھ مل کر ربن کاٹا۔ اہل علاقہ نے مسجد کی تعمیر پر خوشی کا اظہار کرتے ہوئے مسلم ہینڈز پاکستان اور ان کے ڈونرز کا شکریہ ادا کیا، جنہوں نے شہریوں کو نماز اور دینی فرائض کی ادائیگی کے لیے ایک خوبصورت مسجد فراہم کی۔
مسلم ہینڈز پاکستان ان علاقوں میں مساجد کی تعمیر جاری رکھے ہوئے ہے جہاں مسجد موجود نہیں یا آبادی سے بہت دور ہے، اور اہل علاقہ مسجد بنانے کی استطاعت نہیں رکھتے۔ اس اقدام کو اہل علاقہ نے نہایت سراہا۔
