جہلم: جمعیت علمائے اسلام ضلع جہلم کے ضلعی امیر قاری خالق داد اور تحصیل جہلم کے جنرل سیکرٹری قاری شیر خان نے اپنے ایک مشترکہ بیان میں بھارت کی جانب سے رات کی تاریکی میں پاکستان پر بزدلانہ حملوں کی شدید الفاظ میں مذمت کی ہے۔
انہوں نے کہا کہ بھارتی افواج نے نہتے شہریوں اور مساجد کو نشانہ بنا کر حیوانیت کی بدترین مثال قائم کی ہے۔ بھارت کے غیر دانشمندانہ اور غیر اخلاقی اقدامات کے خلاف پوری پاکستانی قوم متحد ہے اور ہم 1965 کے جذبے کے تحت پاک فوج کے شانہ بشانہ کھڑے ہیں۔
رہنماؤں نے کہا کہ وطن سے محبت ایمان کا حصہ ہے اور جمعیت علمائے اسلام کے کارکنان وطن کے دفاع کے لیے ہر وقت تیار ہیں۔ شہداء وطن قوم کا فخر ہیں اور ہم ان کے اہل خانہ کے ساتھ مکمل اظہارِ یکجہتی کرتے ہیں۔ انہوں نے پاک فوج کی بروقت اور دندان شکن جوابی کارروائی کو سراہتے ہوئے بہادر جوانوں کو خراج تحسین پیش کیا۔
انہوں نے مزید کہا کہ علمائے کرام نہ صرف نظریاتی سرحدوں کے محافظ ہیں بلکہ جغرافیائی سرحدوں کی حفاظت اور وطنِ عزیز کے استحکام کے لیے بھی ہمیشہ دعا گو رہتے ہیں۔
