جہلم: منشیات کیس میں دو منشیات فروشوں کو جرم ثابت ہونے پر قید اور جرمانے کی سزا سنا دی گئی۔
تفصیلات کے مطابق جہلم میں منشیات فروشی کے دو الگ الگ مقدمات میں عدالت نے دو منشیات فروشوں کو جرم ثابت ہونے پر 9، 9 سال قید اور ایک ایک لاکھ روپے جرمانے کی سزا سنا دی۔
عدالت نے مقدمہ نمبر 765/23 بجرم CNSA 9(I)3C تھانہ کالا گجراں کا فیصلہ سناتے ہوئے مجرم حیدر علی کو منشیات فروشی کے جرم میں 9 سال قید اور ایک لاکھ روپے جرمانے کی سزا سنائی۔ حیدر علی کو 2023 میں گرفتار کیا گیا تھا، جہلم پولیس نے مقدمہ کی بھرپور پیروی کرتے ہوئے ٹھوس شواہد عدالت میں پیش کیے جس کی بنیاد پر فیصلہ سنایا گیا۔
اسی طرح مقدمہ نمبر 285/23 بجرم CNSA 9(I)3C تھانہ دینہ میں عدالت نے مجرم عمران شہزاد کو بھی منشیات فروشی کے جرم میں 9 سال قید اور ایک لاکھ روپے جرمانے کی سزا سنائی۔ عمران شہزاد کو بھی 2023 میں گرفتار کیا گیا تھا اور پولیس نے مکمل شواہد کے ساتھ چالان عدالت کیا۔
ڈی پی او جہلم طارق عزیز سندھو نے کہا کہ منشیات فروش معاشرے کا ناسور ہیں، ان کے خاتمے کے لیے جہلم پولیس بھرپور آپریشن جاری رکھے گی۔ انہوں نے کیس کی مؤثر تفتیش اور پیروی کرنے پر انویسٹیگیشن اور لیگل ٹیموں کو شاباش دیتے ہوئے تعریفی سرٹیفکیٹ اور نقد انعام دینے کا اعلان بھی کیا۔
