جہلم پولیس نے موٹر سائیکل چوری کی وارداتوں میں ملوث عقیلو گینگ کے خلاف کامیاب کارروائی کرتے ہوئے پانچ ملزمان کو گرفتار کر لیا، چوری شدہ تین موٹر سائیکلیں بھی برآمد کر لی گئیں۔
ترجمان جہلم پولیس کے مطابق جہلم میں ایس ایچ او تھانہ سول لائنز اور ان کی ٹیم نے جدید تفتیشی حکمت عملی کے تحت کارروائی کرتے ہوئے موٹر سائیکل چوری کی متعدد وارداتوں میں ملوث عقیلو گینگ کے پانچ ارکان کو گرفتار کیا۔ کارروائی کے دوران ملزمان کے قبضے سے تین چوری شدہ موٹر سائیکلیں بھی برآمد کر لی گئیں۔
ترجمان کے مطابق گرفتار ملزمان سے مزید تفتیش کی جا رہی ہے تاکہ ان کے دیگر ساتھیوں، سہولت کاروں اور ضلع سمیت دیگر علاقوں میں ہونے والی وارداتوں کے بارے میں معلومات حاصل کی جا سکیں۔
پولیس کا کہنا ہے کہ ملزمان کے خلاف مضبوط شواہد اکٹھے کیے جا رہے ہیں اور مکمل چالان عدالت میں پیش کر کے انہیں قانون کے مطابق قرار واقعی سزا دلوانے کے لیے تمام قانونی تقاضے پورے کیے جائیں گے۔
ڈسٹرکٹ پولیس آفیسر (ڈی پی او) جہلم شفیق احمد چوہدری نے کہا کہ شہریوں کے جان و مال کا تحفظ جہلم پولیس کی اولین ترجیح ہے۔ انہوں نے واضح کیا کہ موٹر سائیکل چوری سمیت ہر قسم کے جرائم میں ملوث عناصر کے خلاف بلاامتیاز کارروائیاں جاری رہیں گی اور قانون شکن عناصر کو کسی صورت رعایت نہیں دی جائے گی۔
