جہلم سے سرکاری کالج کے پروفیسر مبینہ طور پر اغواء، 40 لاکھ روپے تاوان کی ادائیگی کے بعد پروفیسر بازیاب، اغواء کاروں کا ماسٹر مائنڈ مغوی کا سابقہ شاگرد نکلا۔
تفصیلات کے مطابق جہلم کے کچہری روڈ سے سرکاری کالج کے پروفیسر ابراہیم کو 12 اگست کو مبینہ طور پر اغواء کر لیا گیا۔ مسلح ملزمان نے خود کو ایف آئی اے اہلکار ظاہر کیا اور پروفیسر کو ٹیوشن اکیڈمی کے باہر سے گاڑی میں ڈال کر روات لے گئے۔
ذرائع کے مطابق اغواء کار پروفیسر کو ایک گھر میں لے گئے اور ماسٹر مائنڈ سبط شاہ کو اطلاع دی، جو مغوی پروفیسر کا سابقہ شاگرد تھا۔ سبط شاہ نے پروفیسر کے اہل خانہ سے ایک کروڑ روپے تاوان کا مطالبہ کیا تاہم بعدازاں معاملہ 40 لاکھ روپے میں طے ہوا۔
@jhelumupdates جہلم کے سرکاری کالج کے پروفیسر باز۔یاب #JhelumUpdates #LatestNews #fyp #breakingnews #foryoupagе #viralvideos #newsupdate ♬ original sound – Jhelum Updates
13 اگست کو تاوان کی رقم وصول کرنے کے بعد اغواء کاروں نے پروفیسر ابراہیم کو روات بس اڈے کے قریب چھوڑ دیا۔ مغوی کے اہل خانہ نے پولیس کو اطلاع دی جس کے بعد مقدمہ درج کر لیا گیا۔
پولیس ذرائع کے مطابق مختلف علاقوں سے تین ملزمان کو حراست میں لے کر نامعلوم مقام پر منتقل کر دیا گیا ہے جبکہ مرکزی ملزم سبط شاہ سمیت دیگر ملزمان کی گرفتاری کے لیے چھاپے مارے جا رہے ہیں۔
پروفیسر ابراہیم نے دعویٰ کیا ہے کہ بازیابی کے بعد جب انہوں نے پولیس کو رپورٹ درج کروائی تو انہیں قتل کی دھمکیاں بھی ملیں۔ پولیس حکام کا کہنا ہے کہ تمام ملزمان کی گرفتاری اور تاوان کی رقم برآمدگی کے بعد میڈیا کو آگاہ کیا جائے گا۔
