سوہاوہ میں جی ٹی روڈ پر نو گھنٹے سے بدترین ٹریفک جام ہے، حادثے کا شکار آئل ٹینکر کو ہٹانے میں مشکلات کا سامنا کرنا پڑ رہا ہے۔
تفصیلات کے مطابق جہلم کی تحصیل سوہاوہ میں جی ٹی روڈ پر گزشتہ نو گھنٹوں سے بدترین ٹریفک جام کی صورتحال ہے۔ نو گھنٹے قبل جی ٹی روڈ پنڈ متے خان پل پر ایک آئل ٹینکر اور ٹرک کے درمیان تصادم ہوا تھا جس کے بعد ٹریفک کا نظام بری طرح متاثر ہوگیا۔ حادثے کے نتیجے میں ٹریفک کی لائنیں کئی کلو میٹر تک لگ گئیں اور اس دوران سوہاوہ اور گوجرخان کے درمیان سفر کرنے والے لوگ شدید مشکلات کا شکار ہیں۔
حادثے کے فوراً بعد ٹریفک کی روانی رک گئی اور متعدد گاڑیاں، جن میں ایمبولنس اور ایک بارات بھی شامل تھی پھنس گئیں۔ اس کے باوجود کئی گھنٹے گزرنے کے بعد بھی متعلقہ ادارے اور حکام ٹریفک بحال کرنے میں ناکام رہے ہیں۔ صورتحال اس قدر پیچیدہ ہوگئی کہ مسافروں کو مسلسل تاخیر کا سامنا کرنا پڑ رہا ہے۔
موٹروے پولیس نے صورتحال کو قابو کرنے کے لیے مختلف مقامات پر ناکے لگا کر مزید مشکلات پیدا کردیں۔ ان ناکوں کی وجہ سے لوگوں کو بدترین تاخیر کا سامنا کرنا پڑ رہا ہے۔ حادثے کا شکار آئل ٹینکر ابھی تک جی ٹی روڈ سے نہیں ہٹایا جا سکا ہے۔
موٹروے پولیس کے ترجمان کے مطابق آئل ٹینکر میں کروڈ آئل موجود ہے جسے ہٹانے کے لیے کرین منگوائی جا رہی ہے اور اس کام میں انتہائی احتیاط کی ضرورت ہوگی تاکہ کوئی مزید بڑا حادثہ نہ ہو۔
دھند کے باعث موٹرویز کے بند ہونے سے جی ٹی روڈ پر ٹریفک کا دباؤ اور بھی بڑھ گیا ہے اور مسافروں کو مزید مشکلات کا سامنا ہے۔ موٹروے پولیس نے ٹریفک کی روانی کو بہتر بنانے کے لیے ٹریفک کو براستہ چکوال روڈ کی طرف موڑ دیا ہے تاہم ٹریفک کی مکمل بحالی میں مزید کئی گھنٹے لگنے کا امکان ہے۔
اس دوران سوہاوہ ٹول پلازہ اور گوجرخان تک ٹریفک متاثر ہونے کی وجہ سے مقامی لوگوں کو بھی شدید مشکلات کا سامنا کرنا پڑ رہا ہے۔ انتظامیہ نے عوام کو ہدایت کی ہے کہ وہ غیر ضروری سفر سے گریز کریں تاکہ ٹریفک کی حالت مزید بگڑنے سے بچ سکے۔
@jhelumupdates جہلم: سوہاوہ میں جی ٹی روڈ پر پر کئی گھنٹوں سے بدترین ٹریفک جام ہے جس کی وجہ سے مسافروں کو شدید مشکلات کا سامنا کرنا پڑ رہا ہے۔ #Jhelum #sohawa #trafficjam #pakistan #jhelumupdates ♬ original sound – Jhelum Updates
