سوہاوہ پولیس نے سماج دشمن عناصر کے خلاف کارروائیاں کرتے ہوئے 4 ملزمان کو اسلحہ اور منشیات سمیت گرفتار کر لیا۔
تفصیلات کے مطابق ڈی پی او جہلم طارق عزیز سندھو کی ہدایت پر تھانہ سوہاوہ پولیس نے سماج دشمن عناصر کے خلاف کریک ڈاؤن کرتے ہوئے 4 ملزمان کو گرفتار کر لیا، ملزمان سے بھاری مقدار میں منشیات اور ناجائز اسلحہ برآمد کیا گیا۔
ترجمان پولیس کے مطابق کارروائی کے دوران 2 منشیات فروش ملزمان کو گرفتار کر کے ان کے قبضہ سے 1 کلو سے زائد ہیروئن اور 1 کلو 100 گرام چرس برآمد کی گئی۔ اسی طرح ناجائز اسلحہ رکھنے والے 2 دیگر ملزمان کو بھی گرفتار کیا گیا جن کے قبضہ سے 30 بور کے 2 پستول معہ ایمونیشن برآمد ہوا۔
گرفتار ملزمان کے خلاف تھانہ سوہاوہ میں الگ الگ مقدمات درج کر لیے گئے ہیں۔
ڈسٹرکٹ پولیس آفیسر جہلم طارق عزیز سندھو کا کہنا ہے کہ ناجائز اسلحہ رکھنے والوں اور منشیات فروشوں کے خلاف سخت کریک ڈاؤن جاری ہے۔ ان کا مزید کہنا تھا کہ منشیات فروش معاشرے کا ناسور ہیں اور ان کے خاتمے تک کارروائیاں جاری رہیں گی۔
