سوہاوہ میں ایل پی جی کا خالی ٹینکر دیوار سے ٹکرانے سے ٹینکر ڈرائیور موقع پر ہی جاں بحق ہو گیا۔
تفصیلات کے مطابق جہلم کی تحصیل سوہاوہ میں پیر پلائی اسٹاپ کے قریب ایل پی جی کا خالی ٹینکر تیز رفتاری کے باعث دیوار سے ٹکرا گیا، جس کے نتیجے میں ٹینکر ڈرائیور جاں بحق ہو گیا۔
ریسکیو 1122 کے مطابق حادثہ پیر پلائی اسٹاپ کے قریب پیش آیا، جہاں ایل پی جی کا خالی ٹینکر تیز رفتاری کے باعث بے قابو ہو کر دیوار سے جا ٹکرایا۔ حادثے میں ٹینکر ڈرائیور شدید متاثر ہوا اور موقع پر ہی جاں بحق ہو گیا۔
اطلاع موصول ہوتے ہی قریبی ریسکیو اسٹیشن سوہاوہ سے ایک ایمبولینس جائے وقوعہ پر روانہ کی گئی، جبکہ بعد ازاں ریسکیو اسٹیشن جہلم سے ریسکیو وہیکل بھی بھیجی گئی۔
ریسکیو اہلکاروں نے ضروری کارروائی کے بعد جاں بحق ڈرائیور کی لاش چکوال کی ایمبولینس کے ذریعے ڈسٹرکٹ ہیڈکوارٹرز (ڈی ایچ کیو) ہسپتال چکوال منتقل کر دی۔
