پنڈدادنخان: ڈی پی او جہلم شفیق احمد چوہدری کے احکامات کی روشنی میں تھانہ پنڈدادنخان میں مصالحتی کمیٹی کو باقاعدہ طور پر فعال کر دیا گیا ہے، جس کا مقصد عوامی سطح پر چھوٹے اور معمولی نوعیت کے تنازعات کو فوری اور خوش اسلوبی سے حل کرنا ہے۔
اس سلسلے میں ایس ایچ او تھانہ پنڈدادنخان رانا لطیف کی زیر قیادت مصالحتی کمیٹی کا پہلا باضابطہ اجلاس منعقد ہوا، جس میں باہمی اتفاق رائے سے ملک غلام مصطفی مٹھو کو چیئرمین اور ملک فیصل کھیوڑہ کو وائس چیئرمین مقرر کیا گیا۔
اجلاس کے دوران ایس ایچ او رانا لطیف نے بریفنگ دیتے ہوئے کہا کہ ڈی پی او جہلم کے واضح احکامات ہیں کہ پولیس کو حقیقی معنوں میں عوام دوست بنایا جائے اور ایسے معاملات جو قانونی کارروائی کے دائرہ کار میں نہیں آتے، انہیں باہمی مشاورت اور افہام و تفہیم کے ذریعے حل کیا جائے۔
انہوں نے بتایا کہ گھریلو مسائل، معمولی زمین کے تنازعات اور دیگر چھوٹے جھگڑوں کو مصالحتی کمیٹی کے ذریعے مؤثر انداز میں نمٹایا جائے گا تاکہ عدالتوں اور تھانوں پر بوجھ کم ہو اور عوام کو فوری ریلیف مل سکے۔
نو منتخب چیئرمین ملک غلام مصطفی مٹھو نے اس موقع پر ڈی پی او جہلم کا شکریہ ادا کرتے ہوئے کہا کہ پولیس کی جانب سے عوامی مسائل کے حل کے لیے یہ اقدام نہایت خوش آئند ہے اور کمیٹی اپنی ذمہ داریاں دیانتداری اور شفافیت کے ساتھ ادا کرے گی۔
اجلاس میں شریک کمیٹی ممبران اور سماجی و رفاہی شخصیات نے بھی اس اقدام کو سراہتے ہوئے امید ظاہر کی کہ یہ فورم عوام اور پولیس کے درمیان اعتماد کو مزید مضبوط بنانے اور مقامی سطح پر امن و امان کے قیام میں اہم کردار ادا کرے گا۔
