دینہ: تحصیلدار دینہ راجہ شمشیر حیدر رانجھا نے ریڑھی بازار دینہ کا دورہ کرتے ہوئے مہنگے داموں فروٹ اور سبزی فروخت کرنے والے دکانداروں کے خلاف سخت کارروائی کی اور متعدد پر بھاری جرمانے عائد کیے۔
یہ کارروائی ڈپٹی کمشنر جہلم میثم عباس اور اسسٹنٹ کمشنر دینہ صفاء عابد کی ہدایت پر عمل میں لائی گئی۔ تحصیلدار راجہ شمشیر حیدر رانجھا نے بازار میں موجود دکانداروں کو متنبہ کیا کہ تمام سبزیاں اور پھل مقررہ سرکاری نرخنامے کے مطابق فروخت کیے جائیں۔
انہوں نے کہا کہ عید کے موقع پر عوام کو ریلیف دینا انتظامیہ کی اولین ترجیح ہے، اور کوئی بھی دکاندار اگر ریٹ لسٹ سے زائد قیمتوں پر اشیاء فروخت کرتا پایا گیا تو اس کے خلاف بلا امتیاز سخت قانونی کارروائی عمل میں لائی جائے گی۔
انہوں نے مزید کہا کہ دکانداروں کو چاہیے کہ عید کی خریداری کرنے والے شہریوں، بالخصوص غریب طبقے کے ساتھ مکمل تعاون کریں تاکہ وہ بھی عید کی خوشیوں میں شامل ہو سکیں۔ تحصیلدار دینہ کی اس کارروائی کو عوامی حلقوں میں سراہا گیا اور امید ظاہر کی گئی کہ ناجائز منافع خوری کے خلاف ایسے اقدامات تسلسل کے ساتھ جاری رہیں گے۔
