جہلم: وزیراعلیٰ پنجاب کے ویژن اور انسپکٹر جنرل پولیس پنجاب عبدالکریم کے احکامات پر جہلم پولیس کی جانب سے روزانہ کی بنیاد پر کھلی کچہری کا انعقاد جاری ہے۔
اسی سلسلے میں ڈی پی او جہلم شفیق احمد چوہدری نے کھلی کچہری میں شہریوں کے انفرادی اور اجتماعی مسائل سنے اور ان کے فوری حل کے لیے موقع پر ہی متعلقہ افسران کو احکامات جاری کیے۔
ترجمان جہلم پولیس کے مطابق ڈی پی او شفیق احمد چوہدری نے مختلف شکایات پر متعلقہ پولیس افسران سے ٹیلی فونک رابطہ کیا، مسائل کی نوعیت سے آگاہی حاصل کی اور مقررہ ٹائم فریم کے اندر ان کے حل کو یقینی بنانے کی ہدایت کی۔
اس موقع پر ڈی پی او جہلم نے کہا کہ شہریوں کے اجتماعی اور انفرادی مسائل کے حل کے لیے ان کے دفتر کے دروازے ہر وقت کھلے ہیں اور ہر شہری بلاجھجک اپنی شکایات کے ازالے کے لیے ان سے براہِ راست ملاقات کر سکتا ہے۔
انہوں نے کہا کہ عوام اور پولیس کے درمیان باہمی اعتماد اور رابطے کو مضبوط بنانا وقت کی اہم ضرورت ہے، کیونکہ مؤثر رابطے سے نہ صرف عوامی مسائل کے حل میں آسانی ہوتی ہے بلکہ جرائم کی روک تھام اور امن و امان کے قیام میں بھی مدد ملتی ہے۔
ڈی پی او شفیق احمد چوہدری نے اس عزم کا اعادہ کیا کہ جہلم پولیس عوام کو بروقت انصاف اور بہترین پولیسنگ کی فراہمی کے لیے تمام دستیاب وسائل بروئے کار لا رہی ہے اور شہریوں کے جان و مال کے تحفظ کو ہر صورت یقینی بنایا جائے گا۔
