پنڈدادنخان میں پولیس نے مؤثر کارروائیاں کرتے ہوئے چوری کی متعدد وارداتوں میں ملوث دو مختلف گینگز کے چار کارندوں کو گرفتار کر لیا۔
تفصیلات کے مطابق جہلم کی تحصیل پنڈدادنخان میں تھانہ للِہ پولیس کے ایس ایچ او اور ٹیم نے اہم کارروائی کرتے ہوئے چوری کی متعدد وارداتوں میں ملوث عادل گینگ کے دو ملزمان کو گرفتار کر لیا۔ ملزمان کے قبضے سے 20 ہزار روپے نقدی، بجلی کی تار مالیتی 9 ہزار روپے اور دیگر چوری شدہ سامان برآمد کر لیا گیا۔
اسی طرح ایک اور کامیاب کارروائی میں مزمل گینگ کے دو ملزمان کو بھی گرفتار کیا گیا۔ پولیس نے ملزمان کے قبضے سے چوری شدہ لکڑی مالیتی 2 لاکھ 14 ہزار روپے، چوری شدہ بیٹری اور 5 ہزار روپے نقدی برآمد کر لی۔ برآمد شدہ مال مسروقہ کی مجموعی مالیت لاکھوں روپے بنتی ہے۔
پولیس کے مطابق تمام ملزمان کو ٹھوس شواہد کے ساتھ چالان عدالت کیا جائے گا اور انہیں قرار واقعی سزا دلوائی جائے گی۔
اس حوالے سے طارق عزیز سندھو کا کہنا ہے کہ شہریوں کو ان کے قیمتی اثاثوں سے محروم کرنے والے ملزمان کسی رعایت کے مستحق نہیں اور جرائم پیشہ عناصر کے خلاف بھرپور کارروائیاں جاری رہیں گی۔
