بریڈفورڈ: پاکستان کے ہائی کمشنر ڈاکٹر محمد فیصل نے برٹش پاکستانیوں کی برطانیہ میں شاندار کامیابیوں کے سفر اور ان کی خدمات کو سراہتے ہوئے کہا کہ وہ نہ صرف انفرادی حیثیت سے برطانوی معاشرے میں پاکستان کی مثبت شناخت کو نمایاں کرنے میں اہم کردار ادا کر رہے ہیں بلکہ مختلف شعبوں میں آگے بڑھتے ہوئے پاکستان کا نام روشن کر رہے ہیں جو بلاشبہ پاکستان کیلئے فخر کی بات ہے۔
ان خیالات کا اظہار انہوں نے سابق لارڈ میئر بریڈفورڈ غضنفر خالق کی دعوت پر بریڈفورڈ میں ظہرانے کی ایک تقریب سے خطاب کرتے ہوئے کیا۔ انہوں نے کہا کہ پاکستان ہماری پہچان ہے ،استحکام پاکستان کیلئے ہمیں مل کر کردار ادا کرنا ہوگا۔
تقریب کے میزبان پاکستان پیپلز پارٹی برطانیہ کے مرکزی انفارمیشن سیکرٹری زاہد مغل تھے۔ تقریب میں قونصل جنرل بریڈفورڈ زاہد احمد جتوئی نے بھی خصوصی شرکت کی۔
اس موقع پر سابق لارڈ میئر راجہ غضنفر خالق اور زاہد مغل نے پاکستان ہائی کمشنر کو بریڈفورڈ آمد پر خوش آمدید کہا، انہوں نے ہائی کمشنر اور قونصل جنرل کی فیملی کو تحائف دیئے۔
ظہرانے کی تقریب میں سابق لیڈی میئرس بریڈفورڈ شہناز خالق ،معروف کاروباری شخصیت یونس چوہدری ،کونسلر صبیحہ خان ، کونسلر محمد عمران ،سابق کونسلر کنیز اختر ،بلال درانی، کونسلر ارشد چوہدری، سردار عبدالرحمن، ممتاز بزنس مین چوہدری صغیر پوٹھی، سجاد جرال ،افتخار احمد ،ہیری بوٹا اور مختلف شعبہ ہائے زندگی سے تعلق رکھنے والے افراد نے شرکت کی۔
