جہلم شہر سمیت ضلع بھر میں پھل، سبزیوں اور اشیائے ضروریہ کے من مانے نرخوں اور تجاوزات کی بھرمار نے شہریوں کو شدید پریشانی میں مبتلا کر دیا ہے، جبکہ متعلقہ اداروں کی مبینہ خاموشی کے باعث ان کی کارکردگی پر بھی سوالات اٹھنے لگے ہیں۔
تفصیلات کے مطابق جہلم شہر سمیت ضلع کے مختلف علاقوں میں بعض دکانداروں کی جانب سے اشیائے ضروریہ کے من مانے نرخ وصول کیے جانے کی شکایات سامنے آ رہی ہیں۔ شہریوں کا کہنا ہے کہ درجہ دوم اور سوم کے پھل اور سبزیاں بھی بعض مقامات پر اول درجے کے مقررہ نرخوں سے زائد قیمت پر فروخت کی جا رہی ہیں، جس کے باعث مہنگائی کے پہلے سے موجود دباؤ میں مزید اضافہ ہو رہا ہے۔
شہریوں کے مطابق روزمرہ استعمال کی اشیاء کی خریداری ان کے لیے مشکل ہوتی جا رہی ہے، جبکہ سرکاری نرخ نامے مارکیٹوں میں مؤثر انداز میں نافذ ہوتے دکھائی نہیں دیتے۔ بعض شہریوں کا کہنا ہے کہ سرکاری نرخ نامے بظاہر محض کاغذی کارروائی تک محدود ہیں اور عملی طور پر مختلف مارکیٹوں میں من مانی قیمتیں وصول کی جا رہی ہیں۔
دوسری جانب مارکیٹوں اور سڑکوں پر تجاوزات کی بھرمار بھی شہریوں کے لیے ایک مستقل مسئلہ بنی ہوئی ہے۔ تجاوزات کے باعث پیدل چلنے والوں اور گاڑیوں کی آمدورفت متاثر ہونے کے ساتھ ساتھ بازاروں میں رش اور ٹریفک کے مسائل میں بھی اضافہ ہو رہا ہے۔
شہریوں نے پرائس کنٹرول مجسٹریٹس اور متعلقہ اداروں کی کارکردگی پر تشویش کا اظہار کرتے ہوئے اعلیٰ حکام سے مطالبہ کیا ہے کہ مارکیٹوں میں باقاعدگی سے موثر نگرانی کی جائے، من مانے نرخ وصول کرنے والے عناصر کے خلاف قانون کے مطابق کارروائی عمل میں لائی جائے، مختلف درجات کی اشیاء کے معیار کے مطابق قیمتوں کی پابندی یقینی بنائی جائے اور تجاوزات کے خلاف بھی بلاامتیاز کارروائی کی جائے۔
