جہلم: وزیراعلیٰ پنجاب مریم نواز شریف کے دھی رانی پروگرام کا مقصد غریب، نادار اور بے سہارا بچیوں کے والدین کا بوجھ کم کرنا اور ان کے گھروں میں خوشیاں بکھیرنا تھا، مگر افسوس کہ ضلع جہلم میں اب تک اس منصوبے کے تحت ایک بھی اجتماعی شادی کی تقریب منعقد نہیں ہو سکی۔
پنجاب کے دیگر اضلاع میں دھی رانی پروگرام کے تحت اجتماعی شادیوں کی تقاریب منعقد کی جا رہی ہیں جہاں درجنوں بچیوں کی شادیاں سرکاری سرپرستی میں انجام پائیں، تاہم ضلع جہلم اور گردونواح کے غریب والدین اپنی بیٹیوں کی شادی کے لیے اب بھی دربدر ہیں۔
متاثرہ والدین کا کہنا ہے کہ جہیز کی کمی اور مالی تنگدستی کے باعث بیٹیاں گھروں میں بیٹھی ہیں، جبکہ ان کی فریاد سننے والا کوئی نہیں۔
شہریوں نے وزیراعلیٰ پنجاب مریم نواز شریف، صوبائی وزیرِ سماجی بہبود اور متعلقہ حکام سے اپیل کی ہے کہ جہلم میں بھی دھی رانی پروگرام کے تحت اجتماعی شادیوں کا انعقاد کیا جائے تاکہ غریب والدین کے دلوں میں امید کی شمع دوبارہ روشن ہو سکے۔
