سوہاوہ: دی پیراگون گرامر اسکول ڈومیلی میں سالانہ نتائج کے اعلان کے موقع پر ایک پروقار اور رنگا رنگ تقریب کا انعقاد کیا گیا، جس میں طلبہ، والدین اور معزز مہمانوں کی بڑی تعداد نے شرکت کی۔
تقریب کا باقاعدہ آغاز تلاوتِ کلامِ پاک اور نعتِ رسولِ مقبول ﷺ سے کیا گیا، جس کے بعد طلبہ نے اسٹیج پر مختلف ٹیبلو اور ثقافتی پروگرام پیش کیے۔ بچوں کی پرفارمنس نہ صرف دلکش رہی بلکہ انہوں نے اپنے اعتماد اور صلاحیتوں کا بھی بھرپور مظاہرہ کیا، جس پر حاضرین نے انہیں زبردست خراجِ تحسین پیش کیا۔
تقریب خوشگوار ماحول اور منظم انداز کے باعث شرکاء کی بھرپور توجہ کا مرکز بنی رہی۔
تقریب کے مہمانِ خصوصی ڈائریکٹر لیاقت گرلز کالج دینہ مبشر حسن تھے، جبکہ دیگر معزز مہمانوں میں محمد حسیب، حافظ ابرار کیانی، فضل الرحمن اور راجہ سعد شامل تھے۔ مہمانانِ گرامی کا اسکول انتظامیہ کی جانب سے پرتپاک استقبال کیا گیا۔
مہمانِ خصوصی اور دیگر مہمانوں نے نمایاں کارکردگی دکھانے والے طلبہ میں انعامات اور اسناد تقسیم کیں اور ان کی محنت کو سراہا۔ اس موقع پر خطاب کرتے ہوئے مقررین نے کہا کہ معیاری تعلیم کے فروغ میں اساتذہ کا کردار بنیادی اہمیت رکھتا ہے، اور ایسے ادارے معاشرے کی مثبت تشکیل میں کلیدی کردار ادا کرتے ہیں۔
انہوں نے اسکول کے تعلیمی معیار، نظم و ضبط اور اساتذہ کی پیشہ ورانہ صلاحیتوں کو قابلِ ستائش قرار دیتے ہوئے کہا کہ دی پیراگون گرامر اسکول ڈومیلی نہ صرف تعلیمی میدان میں بلکہ کردار سازی میں بھی نمایاں خدمات انجام دے رہا ہے۔
تقریب کے اختتام پر والدین نے اسکول کی کارکردگی پر اطمینان کا اظہار کرتے ہوئے انتظامیہ اور اساتذہ کی کاوشوں کو سراہا اور اپنے بچوں کے روشن مستقبل کے لیے نیک خواہشات کا اظہار کیا۔
