جہلم میں پرائس کنٹرول مجسٹریٹس کی ناکامی کے باعث دکانداروں نے اشیائے خوردونوش من مانی قیمتوں پر فروخت کرنا شروع کر دی ہیں جبکہ چیک اینڈ بیلنس کا نظام مکمل طور پر مفلوج ہو چکا ہے۔ انتظامیہ کی بے حسی کے سبب غریب اور سفید پوش طبقہ شدید مشکلات کا شکار ہے۔
تفصیلات کے مطابق جہلم شہر سمیت ضلع بھر میں گراں فروشوں نے اپنی الگ ریاست قائم کر رکھی ہے۔ بڑے تاجر، ڈیلرز اور سپلائرز اپنی مرضی کے نرخ مقرر کرکے روزانہ کی بنیاد پر اشیائے خوردونوش انتہائی مہنگے داموں فروخت کر رہے ہیں، جس کے باعث عام شہریوں کی مشکلات میں اضافہ ہو گیا ہے۔
مرغی کا گوشت فروخت کرنے والے دکاندار بھی ناجائز منافع خوری میں کسی سے پیچھے نہیں۔ نہ صرف نرخوں میں خودساختہ اضافہ کر دیا گیا ہے بلکہ کم وزن فروخت کرنے جیسے غیر قانونی عمل میں بھی دیدہ دلیری کے ساتھ ملوث پائے جا رہے ہیں۔ اس سنگین صورتحال پر شہریوں اور سول سوسائٹی نے شدید احتجاج کرتے ہوئے انتظامیہ کی پراسرار خاموشی پر سوالات اٹھائے ہیں۔
عوامی حلقوں نے وزیراعلیٰ پنجاب مریم نواز شریف، چیف سیکرٹری پنجاب، کمشنر راولپنڈی، ڈپٹی کمشنر جہلم اور دیگر متعلقہ حکام سے فوری نوٹس لینے اور ناجائز منافع خوروں کے خلاف سخت کارروائی کا مطالبہ کیا ہے۔
