دینہ میں قبرستان کی اراضی پر قبضہ اور راستہ بند کرنے کے مقدمہ میں ملوث ملزم کو پولیس نے گرفتار کر لیا۔
تفصیلات کے مطابق جہلم کی تحصیل دینہ میں ایس ایچ او تھانہ منگلا کینٹ اور ان کی ٹیم نے بروقت کارروائی کرتے ہوئے قبرستان کی اراضی پر ناجائز قبضہ کرنے اور عوامی راستہ بند کرنے کے مقدمہ میں ملوث ملزم کو گرفتار کر لیا۔
ملزم کے خلاف تھانہ منگلا کینٹ میں باقاعدہ مقدمہ درج کیا گیا تھا، جس پر پولیس نے قانونی کارروائی عمل میں لاتے ہوئے اسے حراست میں لے لیا۔ پولیس حکام کا کہنا ہے کہ ملزم کو ٹھوس شواہد کے ساتھ چالان عدالت پیش کیا جائے گا۔
اس موقع پر ڈی پی او جہلم طارق عزیز سندھو نے واضح کیا کہ زمینوں، قبرستانوں اور عوامی راستوں پر ناجائز قبضہ کرنے والوں کے خلاف بلا امتیاز سخت قانونی کارروائی کی جائے گی۔ انہوں نے کہا کہ عوامی مفاد کو نقصان پہنچانے اور مقدس مقامات پر قبضے جیسے جرائم کسی صورت برداشت نہیں کیے جائیں گے۔
