جہلم: ایکسائز اینڈ ٹیکسیشن آفیسر جہلم نے اپنی ٹیم کے ہمراہ بڑی کارروائی کرتے ہوئے فروٹ کے ڈبوں میں چھپا کر جعلی اور غیر قانونی سگریٹ اسمگل کرنے کی کوشش ناکام بنا دی۔
کارروائی ایکسائز ٹیم کے افسران مدثر رضا گوندل اور انسپکٹر ناصر صدیق کی نگرانی میں کی گئی، جہاں مشکوک سامان کی چیکنگ کے دوران فروٹ کے ڈبوں کی تلاشی لی گئی۔
تلاشی کے دوران جعلی اور نان ڈیوٹی پیڈ سگریٹ کے 440 پیکٹس برآمد کر کے قبضے میں لے لیے گئے۔
ایکسائز حکام کے مطابق ضبط شدہ سگریٹ غیر قانونی طور پر مارکیٹ میں سپلائی کیے جانے تھے، تاہم بروقت کارروائی کے باعث قومی خزانے کو بھاری نقصان سے بچا لیا گیا۔
حکام نے کہا ہے کہ جعلی اور غیر قانونی مصنوعات کے خلاف کریک ڈاؤن مزید سخت کیا جائے گا اور قانون شکنی میں ملوث عناصر کے خلاف بلا امتیاز کارروائیاں جاری رہیں گی۔
