جہلم: تھانہ سٹی پولیس نے ایس ایچ او کی سربراہی میں کارروائی کرتے ہوئے اسلحہ کی نمائش، ناجائز اسلحہ رکھنے اور تیز رفتاری جیسے جرائم میں ملوث چھ ملزمان کو گرفتار کر لیا۔ کارروائی شہریوں کی شکایات اور خفیہ اطلاعات پر کی گئی۔
ترجمان پولیس کے مطابق گرفتار ملزمان میں عتیق ظفر، شاہد انجم، حامد علی اور عارف اللہ شامل ہیں، جنہیں شاہراہِ عام پر اسلحہ کی نمائش کے الزام میں گرفتار کیا گیا۔ جب کہ ملزم نثار کے قبضے سے ناجائز 223 بور رائفل بمعہ ایمونیشن برآمد ہوئی۔
اسی طرح ملزم محمد فرحان کو شہریوں کی زندگیوں کو خطرے میں ڈالنے والی تیز رفتاری سے گاڑی چلانے کے جرم میں گرفتار کیا گیا۔ پولیس کے مطابق تمام ملزمان نے شاہراہِ عام پر خلافِ قانون حرکات کر کے عوامی سلامتی کو خطرے میں ڈالا۔
تمام گرفتار افراد کے خلاف تھانہ سٹی میں مقدمات درج کر لیے گئے ہیں اور مزید قانونی کارروائی جاری ہے۔
پولیس ترجمان نے کہا ہے کہ شہریوں کے تحفظ اور قانون کی بالادستی کو یقینی بنانے کے لیے ایسے عناصر کے خلاف بلا امتیاز کارروائیاں جاری رہیں گی۔
