دینہ: اسسٹنٹ کمشنر دینہ صفاء عابد نے فوری اور مؤثر کارروائی کرتے ہوئے مرکزی جامع مسجد مین چوک دینہ کے بند کیے گئے مین گیٹ کو بحال کروا دیا۔
مذکورہ گیٹ غیر قانونی طور پر بند کر کے دس لاکھ روپے لے کر پکوڑوں اور سموسوں کی دوکان قائم کر دی گئی تھی، جس پر مقامی صحافی نثار احمد مغل نے نوٹس لیتے ہوئے تحریری درخواست دی تھی۔
درخواست موصول ہونے پر اسسٹنٹ کمشنر دینہ صفاء عابد نے فوری نوٹس لیتے ہوئے چیف آفیسر میونسپل کمیٹی دینہ محمد فیصل اور ہیڈ کلرک میاں سہیل کی مدد سے کارروائی کروائی۔ دوکان اور دیوار کو موقع پر گرا دیا گیا اور مسجد کا اصل راستہ نمازیوں کے لیے دوبارہ کھول دیا گیا۔
یہ مین گیٹ نمازیوں کے لیے مرکزی داخلہ راستہ تھا جسے ذاتی مفادات کی خاطر بند کر کے کمرشل استعمال میں لایا گیا تھا، جس سے عوام اور نمازیوں کو شدید مشکلات کا سامنا تھا۔
عوامی و سماجی حلقوں نے اس بروقت اور جرات مندانہ اقدام پر اسسٹنٹ کمشنر دینہ صفاء عابد کو زبردست خراجِ تحسین پیش کیا۔ شہریوں نے کہا کہ سرکاری اراضی اور عبادت گاہوں کے تقدس کو پامال کرنے والے عناصر کے خلاف اس طرح کی کارروائیاں وقت کی اہم ضرورت ہیں۔
