دبئی سے آنے والا منگلا کا رہائشی جی ٹی روڈ پر جعلی کسٹم اہلکاروں کے ہاتھوں لٹ گیا

منگلا/ روات: جی ٹی روڈ پر بیرون مما لک سے وطن واپس آنے والے پھر جعلی کسٹم اہلکار و ں کے ہاتھوں لٹنے لگے۔

گزشتہ روز دبئی سے آنے والے منگلا کالونی کے رہائشی ایاز قدیر سے 13 لاکھ روپے سے زائد مالیت کے درہم چھین لئے گئے۔

ایاز قدیر سکنہ منگلا کالونی نے تھانہ روات میں رپورٹ درج کراتے ہوئے کہا کہ وہ گزشتہ روز دبئی سے اسلام آباد پہنچا، ائرپورٹ سے اپنے بھائی اور والد کے ہمراہ کیری ڈبہ میں گھر کے لئے روانہ ہوئے تو چھنی پل سترہ میل سٹاپ جی ٹی روڈ پر عقب سے ہوٹر بجاتی سلور رنگ کی ہونڈا گاڑی نے ہماری گاڑی روک لی۔

متاثرہ شخص نے بتایا کہ جعلی کسٹم اہلکاروں نے ہماری گاڑی کا دروازہ کھول کرکہا گیا کہ جو بندہ باہر سے آیا ہے اس کی تلاشی لینی ہے۔ پاسپورٹ وغیرہ دیکھ کر پرس چیک کرانے کا کہا، اسی دوران ملزمان پرس چھین کر فرار ہوگئے۔ پرس میں 18 ہزار سے زائد اماراتی درہم اور دیگر رقم تھی جس کی مالیت تیرہ لاکھ روپے سے زائد بنتی ہے۔

پولیس تھانہ روات نے مقدمہ درج کر لیا۔