جہلم: ڈسٹرکٹ پولیس آفیسر جہلم ناصر محمود باجوہ کی ہدایت کے مطابق پبلک سروس گاڑیوں کی فٹنس، روٹ پرمٹ اور لائسنس چیکنگ کا سلسلہ جاری ہے۔
ٹریفک پولیس نے ضلع جہلم میں گزشتہ ماہ 80 ان فٹ گاڑیاں بند کر دیں، 3181 پبلک سروس گاڑیوں کے چالان کیے گئے۔ قانون کی خلاف ورزی پر 29 لاکھ 72 ہزار روپے کے جرمانے کئے گئے۔
بغیر لائسنس گاڑی چلانے والے 2485 ڈرائیوروں کے خلاف قانونی کارروائی کی گئی، غفلت کے مرتکب ڈرائیوروں کے 279 چالان کیے گئے ہیں۔ پبلک سروس گاڑیوں کے ڈرائیوروں/ مالکان کے خلاف5 مقدمات بھی درج کیے گئے۔
اس حوالے سے ڈسٹرکٹ پولیس آفیسر جہلم ناصر محمود باجوہ نے کہا کہ غفلت و کوتاہی کے مرتکب گاڑیوں کے مالکان اور اڈہ منیجرز کے خلاف بھی کارروائی ہو گی، شہریوں کی زندگی کو خطرے میں ڈالنے والوں کے خلاف قانونی کارروائی کو یقینی بنایا جائے گا۔
