جہلم: یوم مزدور ہمیں محنت کشوں کی قربانیوں، جدوجہد اور حقوق کے لیے دی گئی جانوں کی یاد دلاتا ہے۔
ان خیالات کا اظہار پنجاب پی ڈبلیو ڈی کے سینئر مزدور رہنما حاجی محمد افضل بلوچ نے یوم مزدور کے موقع پر میڈیا نمائندگان سے خصوصی گفتگو کے دوران کیا۔ انہوں نے کہا کہ مزدور طبقے نے ہمیشہ اپنے حقوق کے حصول اور وطن عزیز کی ترقی کے لیے انتھک محنت کی ہے۔ یکم مئی ان قربانیوں کا اعتراف اور انہیں خراج عقیدت پیش کرنے کا دن ہے، تاہم اصل میں ہر دن مزدور کا دن ہے۔
حاجی افضل بلوچ نے کہا کہ اسلام ایک ایسا نظام دیتا ہے جو سماجی انصاف، مساوات اور انسانی حقوق کے احترام پر مبنی ہے، لہٰذا حکومتوں کو چاہیے کہ وہ ان اصولوں کو مدِنظر رکھتے ہوئے مزدوروں کے حالات کار اور معیارِ زندگی کو بہتر بنانے کے لیے عملی اقدامات کریں۔
انہوں نے حکومت پر تنقید کرتے ہوئے کہا کہ اگرچہ حکومت نے مزدور کی 26 دن کی تنخواہ 37 ہزار روپے مقرر کر رکھی ہے، لیکن زمینی حقائق اس کے برعکس ہیں۔ "ضلع بھر میں بیشتر مالکان نہ تو مزدوروں کو ماہانہ چار چھٹیاں دیتے ہیں اور نہ ہی مکمل اجرت ادا کرتے ہیں”، انہوں نے الزام لگایا۔
حاجی افضل بلوچ نے محکمہ لیبر پر بھی تنقید کرتے ہوئے کہا کہ وہ سب کچھ جاننے کے باوجود خاموش تماشائی بنا ہوا ہے۔ حاجی محمد افضل بلوچ نے صوبائی وزیر محنت اور سیکرٹری محنت سے مطالبہ کیا کہ وہ قانون پر عملدرآمد نہ کرنے والوں کے خلاف سخت کارروائی کریں تاکہ غریب محنت کش حکومتی مراعات سے فائدہ اٹھا سکیں اور خوشحال زندگی گزار سکیں۔
آخر میں انہوں نے کہا کہ وہ ان تمام مزدوروں کو سلام عقیدت پیش کرتے ہیں جنہوں نے سرمایہ دارانہ نظام کے خلاف آواز بلند کی اور اپنے حقوق کی خاطر جانوں کا نذرانہ پیش کیا۔
