دینہ: پولیس کی جانب سے غیر قانونی پتنگ بازی کے خلاف کارروائیاں مزید تیز کر دی گئی ہیں۔ اسی سلسلے میں تھانہ دینہ کے علاقے میں پتنگ بازی میں ملوث 2 ملزمان کو گرفتار کر لیا گیا ہے۔
تفصیلات کے مطابق جہلم کی تحصیل دینہ میں جدید ٹیکنالوجی اور ڈرون کیمروں کی مدد سے مختلف علاقوں کی مانیٹرنگ کے دوران پولیس نے بروقت کارروائی کرتے ہوئے دو افراد کو پتنگ بازی کرتے ہوئے رنگے ہاتھوں گرفتار کیا۔ پولیس کی خصوصی ٹیمیں چھتوں اور حساس مقامات پر مسلسل نگرانی کر رہی ہیں تاکہ اس خونی کھیل کا مکمل خاتمہ یقینی بنایا جا سکے۔
اس حوالے سے ڈسٹرکٹ پولیس آفیسر جہلم طارق عزیز سندھو نے کہا ہے کہ پتنگ بازی ایک خطرناک اور جان لیوا کھیل ہے، جس سے قیمتی انسانی جانوں کو شدید خطرات لاحق ہوتے ہیں۔ انہوں نے شہریوں پر زور دیا کہ وہ ذمہ داری کا مظاہرہ کریں، اس غیر قانونی سرگرمی سے مکمل اجتناب کریں اور اپنے بچوں کو بھی پتنگ بازی سے دور رکھیں۔
ڈی پی او جہلم نے عوام سے اپیل کی کہ پتنگ بازی کی روک تھام میں پولیس کا بھرپور ساتھ دیں اور کسی بھی خلاف ورزی کی فوری اطلاع دیں، تاکہ قانون پر عملدرآمد یقینی بنایا جا سکے اور شہریوں کی جان و مال کا تحفظ ممکن ہو۔
