سوہاوہ میں 1990 کی دہائی کے لیجنڈ کرکٹ کھلاڑیوں کے اعزاز میں ایک پروقار عید ملن پارٹی کا انعقاد کیا گیا، جس کی میزبانی عرفان شہزاد (ڈائریکٹر دارِارقم سکول ڈومیلی) نے کی۔ تقریب میں ماضی کی یادیں اور کرکٹ کا جنون ایک بار پھر تازہ ہو گیا۔
تقریب میں 90 کی دہائی کے نامور کھلاڑیوں کے ساتھ ساتھ ان کے دیرینہ دوستوں اور کرکٹ کے شائقین نے بڑی تعداد میں شرکت کی۔ محفل کا ماحول خوشگوار اور جذباتی تھا، جہاں پرانے ساتھیوں نے ماضی کے میچوں، یادگار چھکوں اور وکٹوں کے دلچسپ قصے سنا کر محفل کو گرمائے رکھا۔
میزبان عرفان شہزاد نے اس موقع پر گفتگو کرتے ہوئے کہا کہ یہ کھلاڑی ہمارے علاقے کا قیمتی اثاثہ ہیں اور 1990 کی دہائی جوہدہ کی کرکٹ کا سنہری دور تھا۔ انہوں نے کہا کہ ان کھلاڑیوں نے اپنی محنت اور کھیل کے ذریعے نوجوان نسل کو مثبت سرگرمیوں کی طرف راغب کیا، اور اس تقریب کا مقصد ان کی خدمات کو سراہنا اور پرانی دوستیوں کو مزید مضبوط بنانا ہے۔
شرکاء نے اس خوبصورت روایت کو برقرار رکھنے پر عرفان شہزاد کا شکریہ ادا کیا اور اس عزم کا اظہار کیا کہ ایسی مثبت سرگرمیاں آئندہ بھی جاری رکھی جائیں گی تاکہ نئی نسل اپنے مقامی ہیروز سے روشناس ہو سکے۔
