جہلم: بچوں میں کھیلوں کے فروغ، صحت مند سرگرمیوں کی حوصلہ افزائی اور مثبت طرزِ زندگی کو فروغ دینے کے لیے سپورٹس شرٹس تقسیم کرنے کی تقریب منعقد ہوئی۔
تقریب میں ڈپٹی کمشنر جہلم میر رضا اوزگن، ڈسٹرکٹ سپورٹس آفیسر چوہدری محمد طارق اور دیگر متعلقہ افسران نے شرکت کی، جبکہ مختلف کھیلوں کی سرگرمیوں میں حصہ لینے والے ننھے بچوں میں سپورٹس شرٹس تقسیم کی گئیں۔
اس موقع پر بچوں کی حوصلہ افزائی اور کھیلوں کے مثبت رجحان کے فروغ پر خصوصی توجہ دی گئی۔
ڈپٹی کمشنر جہلم میر رضا اوزگن نے خطاب کرتے ہوئے کہا کہ بچوں کو کم عمری سے ہی کھیلوں اور مثبت سرگرمیوں کی جانب راغب کرنا نہایت ضروری ہے۔
انہوں نے کہا کہ کھیل بچوں کی جسمانی نشوونما، ذہنی صلاحیتوں اور خود اعتمادی میں اہم کردار ادا کرتے ہیں اور صحت مند معاشرے کے قیام میں بھی معاون ثابت ہوتے ہیں۔
ڈسٹرکٹ سپورٹس آفیسر چوہدری محمد طارق نے کہا کہ ضلع جہلم میں بچوں اور نوجوانوں کے لیے کھیلوں کے فروغ اور بہتر سہولیات کی فراہمی کے لیے مختلف اقدامات جاری ہیں۔
انہوں نے کہا کہ مستقبل میں بھی ایسے پروگرامز کا انعقاد جاری رکھا جائے گا تاکہ بچوں میں کھیلوں کا رجحان مزید فروغ پا سکے اور نوجوان نسل مثبت سرگرمیوں کی طرف راغب ہو۔
