دینہ شہر کی تعمیر و ترقی اولین ترجیح ہے، صفائی کے حوالے سے عملی اقدامات کئے جا رہے ہیں، گلشن نورین

دینہ شہر کی تعمیر وترقی اولین ترجیح ہے، شہر کی صفائی کے حوالے سے عملی اقدامات کئے جارہے ہیں، میونسپل کمیٹی دینہ کم وسائل کے باوجود اپنا کام جاری وساری رکھے ہوئے ہے۔

ان خیالات کا اظہار چیف آفیسر میونسپل کمیٹی دینہ گلشن نورین نے کیا۔ انہوں نے دینہ شہر کے مسائل کو انتہائی غور سے سنا اور ان اقدامات سے آگاہ کیا جو کیے جا چکے ہیں۔ شہر میں روزانہ صفائی ہوتی ہے مگر اس کے باوجود صفائی حسب ضرورت دیکھائی نہیں دیتی اس کا مستقل حل کر رہے ہیں۔

انہوں نے کہا کہ بلدیہ کے پاس صرف چار ملازم ہیں، ڈیلی ویجیز پر کام کرنے والوں کو بعض اوقات تنخواہ تاخیر سے ملتی ہے جس سے مسائل پیدا ہوتے ہیں۔ بہرحال اس پر بھی ہماری خصوصی توجہ ہے۔

گلشن نورین نے کہا کہ جی ٹی روڈ پر لگائے گئے پودے اور گھاس کے لیے عامر رفیق کی ڈیوٹی لگا دی ہے تاکہ حسب ضرورت پودوں کو پانی دیا جا سکے، عامر رفیق کے پاس 11 ملازم کام کرتے ہیں۔ ڈپٹی کمشنر جہلم کی اس طرف خصوصی توجہ ہے۔ میونسپل کمیٹی دینہ کے ذرائع آمدن انتہائی محدود ہوگئے ہیں، صرف رکشہ سٹینڈ یا پھر جرمانہ کی رقم سے نظام چلایا جا رہا ہے، واٹر سپلائی کے متعلق بہتر سے بہتر کام کیا جا رہا ہے امید ہے کہ ہماری مشترکہ کاوش سے اب شہریوں کو صاف پانی ملے گا۔

ان کا کہنا تھا کہ میری ترجیح ہوگی کہ سینیٹیشن کے سسٹم کو ماڈرن کیا جائے گا، نئی مشینری کی خریداری کر رہے ہیں، بڑے کنٹینرز کی سکیم زیر غور ہے جو بھی مشینری لیں گے اس کا مثبت استعمال کیا جائے گا۔