جہلم: ایڈیشنل آئی جی ٹریفک مرزا فاران بیگ اور ڈی پی او جہلم طارق عزیز سندھو کی ہدایات پر ڈی ایس پی ٹریفک خرم فیاض اور سرکل انچارجز نے جہلم کے مختلف بس اسٹینڈز کا دورہ کیا۔
اس موقع پر پبلک سروس گاڑیوں کے ڈرائیور حضرات کو پاسنگ پرمٹ، لائسنس، گاڑی کی فٹنس اور دیگر قانونی تقاضوں سے متعلق مفصل بریفنگ دی گئی۔
ڈی ایس پی ٹریفک نے واضح کیا کہ اوورلوڈنگ، اوورچارجنگ اور اوور اسپیڈنگ کسی صورت برداشت نہیں کی جائے گی۔ خلاف ورزی کی صورت میں نہ صرف بھاری جرمانے عائد کیے جائیں گے بلکہ گاڑی بند اور قانونی کارروائی بھی عمل میں لائی جائے گی۔
ان کا کہنا تھا کہ جن گاڑیوں کے پاس درست پاسنگ پرمٹ یا لائسنس موجود نہیں ہو گا، اُن کے خلاف سخت قانونی کارروائی عمل میں لائی جائے گی۔
ٹریفک پولیس افسران نے موقع پر موجود تمام ڈرائیورز کو محفوظ ڈرائیونگ کے اصولوں اور حادثات سے بچاؤ کی تدابیر سے آگاہ کیا۔ ڈرائیورز کو باور کروایا گیا کہ وہ نہ صرف اپنی بلکہ مسافروں کی قیمتی جانوں کے محافظ ہیں، لہٰذا ان پر یہ بھاری ذمہ داری عائد ہوتی ہے کہ وہ دوران سفر قوانین کی مکمل پاسداری کریں۔
اس موقع پر ٹریفک پولیس نے شہریوں سے بھی اپیل کی کہ وہ کسی بھی خلاف ورزی کی صورت میں فوری طور پر متعلقہ حکام کو اطلاع دیں تاکہ قانون شکنی کے خلاف بروقت کارروائی عمل میں لائی جا سکے۔
