جہلم: ڈپٹی کمشنر جہلم میر رضا اوزگن کی ہدایت پر ایڈیشنل ڈپٹی کمشنر جنرل جہلم و مینیجنگ ڈائریکٹر راولپنڈی ویسٹ مینجمنٹ کمپنی جہلم علیزہ ریحان نے "ستھرا پنجاب” پروگرام کی پیشرفت کا جائزہ لینے کے لیے اہم اجلاس منعقد کیا۔
اجلاس میں تحصیل منیجرز، اسسٹنٹ تحصیل منیجرز اور فیلڈ مانیٹرنگ افسران نے شرکت کی، جبکہ ضلع بھر میں صفائی ستھرائی کے انتظامات اور کوڑا کرکٹ کی بروقت تلفی کے عمل کا تفصیلی جائزہ لیا گیا۔
علیزہ ریحان نے فیلڈ افسران کو ہدایت کی کہ وہ اپنی موجودگی کو یقینی بنائیں اور روزانہ کی بنیاد پر صفائی کی صورتحال کی نگرانی کریں۔ انہوں نے واضح کیا کہ ڈپٹی کمشنر میر رضا اوزگن کی ہدایات کے مطابق کسی بھی علاقے میں گندگی کے ڈھیر ہرگز برداشت نہیں کیے جائیں گے۔
اجلاس میں اس امر پر بھی زور دیا گیا کہ صفائی کا نظام عوامی صحت سے براہِ راست جڑا ہوا ہے، اس لیے افرادی قوت اور مشینری کا بھرپور استعمال یقینی بنایا جائے تاکہ شہریوں کو صاف ستھرا اور صحت مند ماحول فراہم کیا جا سکے۔
ضلعی انتظامیہ نے اس عزم کا اعادہ کیا کہ "ستھرا پنجاب” مہم کے تحت صفائی کے اعلیٰ معیار کو برقرار رکھا جائے گا اور کسی قسم کی غفلت پر سخت کارروائی عمل میں لائی جائے گی۔
