سوہاوہ: تعلیمی بورڈ کے زیرِ اہتمام منعقدہ میٹرک کے سالانہ امتحانات کے شاندار نتائج میں دارِارقم سکول ڈومیلی نے ایک بار پھر اپنی تعلیمی برتری ثابت کرتے ہوئے علاقہ بھر کے نجی تعلیمی اداروں میں نمایاں پوزیشن حاصل کر لی۔
تفصیلات کے مطابق دارِارقم سکول ڈومیلی کے ہونہار طالب علم محمد طہ ثاقب نے میٹرک کے امتحان میں مجموعی طور پر 1200 میں سے 1142 نمبر حاصل کیے، جس کے باعث انہوں نے علاقے کے نجی سکولوں کے طلبہ میں نمایاں مقام حاصل کیا۔ طالب علم کی شاندار کارکردگی کو ادارے، والدین اور اہلِ علاقہ کے لیے باعثِ فخر قرار دیا جا رہا ہے۔
دارِارقم سکول ڈومیلی کی انتظامیہ نے شاندار تعلیمی نتائج پر خوشی کا اظہار کرتے ہوئے کہا کہ یہ کامیابی اللہ تعالیٰ کے فضل و کرم، اساتذہ کی انتھک محنت، طلبہ کی شبانہ روز کاوشوں اور والدین کے بھرپور تعاون و اعتماد کا نتیجہ ہے۔
انتظامیہ نے کہا کہ ادارہ طلبہ کو معیاری تعلیم فراہم کرنے اور انہیں تعلیمی میدان میں آگے بڑھنے کے مواقع فراہم کرنے کے لیے اپنی کاوشیں جاری رکھے ہوئے ہے۔ انہوں نے اس عزم کا اظہار کیا کہ مستقبل میں بھی بہترین تعلیمی نتائج کی روایت کو مزید بہتر انداز میں برقرار رکھا جائے گا۔
میٹرک امتحانات میں دارِارقم سکول ڈومیلی کی شاندار کارکردگی اور طالب علم محمد طہ ثاقب کی نمایاں کامیابی پر اہلِ علاقہ، سماجی شخصیات اور والدین نے سکول انتظامیہ، اساتذہ، محمد طہ ثاقب اور دیگر کامیاب طلبہ کو دلی مبارکباد پیش کی اور ان کے روشن مستقبل کے لیے نیک خواہشات کا اظہار کیا۔
