جہلم: وزیر اعلیٰ پنجاب کے ویژن کے مطابق رمضان المبارک کے دوران شہریوں کو بہترین اور خوشگوار ماحول فراہم کرنے کے لیے ڈپٹی کمشنر جہلم میر رضا اوزگن نے مین بازار کا تفصیلی دورہ کیا۔
دورے کے دوران انہوں نے بازار میں رمضان الیومینیشن (چراغاں) کے انتظامات کا جائزہ لیا اور متعلقہ افسران کو ہدایت کی کہ مقدس مہینے کی آمد کے موقع پر بازاروں کو خوبصورتی سے سجایا جائے تاکہ خریداری کے لیے آنے والے شہریوں کو روحانی اور خوشگوار ماحول میسر آ سکے۔
ڈپٹی کمشنر جہلم میر رضا اوزگن نے بازار کی خوبصورتی کو متاثر کرنے والے غیر قانونی سٹیمرز اور اشتہاری بورڈز فوری طور پر ہٹانے کے احکامات جاری کیے۔
انہوں نے میونسپل کمیٹی کے افسران کو سختی سے ہدایت کی کہ مین بازار اور اس سے ملحقہ گلیوں سے تجاوزات اور غیر قانونی سٹیمرز کا مکمل خاتمہ یقینی بنایا جائے تاکہ ٹریفک کی روانی بہتر ہو اور پیدل چلنے والے شہریوں، خصوصاً خواتین اور بچوں کو کسی قسم کی دشواری کا سامنا نہ کرنا پڑے۔
دورے کے موقع پر ڈپٹی کمشنر نے دکانداروں سے بھی ملاقات کی اور انہیں تلقین کی کہ وہ بازار کی خوبصورتی، صفائی اور نظم و ضبط برقرار رکھنے میں ضلعی انتظامیہ کا بھرپور ساتھ دیں۔
انہوں نے واضح کیا کہ وزیر اعلیٰ پنجاب کی ہدایات کی روشنی میں رمضان المبارک کے دوران مصنوعی مہنگائی، ناجائز منافع خوری اور تجاوزات کے خلاف سخت کارروائی عمل میں لائی جائے گی۔ ضلعی انتظامیہ کی جانب سے بازاروں میں صفائی ستھرائی، سیکیورٹی اور قیمتوں کی مانیٹرنگ بھی جاری ہے تاکہ عوام کو رمضان المبارک میں حقیقی ریلیف فراہم کیا جا سکے۔
