جہلم: ضلع جہلم میں سردی نے دستک دیدی، بارش برسنے سے موسم خوشگوار ہو گیا، نشیبی علاقے زیر آب آ گئے۔
تفصیلات کے مطابق جہلم، دینہ، پنڈدادنخان اور سوہاوہ سمیت دیگر علاقوں میں گزشتہ روز سے وقفہ وقفہ سے ہونے والی بارش سے موسم انتہائی خوشگوار ہوگیا ہے، شدید گرمی کے بعد بارش سے ٹھنڈک کا احساس شروع ہو گیا۔
بارش کے باعث نشیبی علاقے زیر آب گئے.دینہ میں نالوں کی مکمل صفائی نہ ہونے کی وجہ سے منگلا روڈ، جی ٹی روڈ، ریلوے روڈ اورمین بازار دریا کا منظر پیش کرنے لگے. انتظامیہ کی نا اہلی کی وجہ سے گلیاں محلے تالاب میں تبدیل ہو گئے.
بارش شروع ہوتے ہی بجلی کی آنکھ مچولی شروع متعدد فیڈر ٹرپ کر گئے۔ ٹھنڈی ہواؤں اور گرج چمک کے ساتھ تیز بارش ہونےسے موسم خوشگوار ہوگیا، حالیہ بارش سے موسم سرما کا باقاعدہ آغاز ہونے کا امکان ہے۔
ادھر پنڈدادنخان اور گردونواح میں بارش سے موسم خوشگوار ہو گیا ہے، بارش سے نشیبی علاقے زیر آب آنے سے لوگوں کو شدید مشکلات کا سامنا کرنا پڑ رہا ہے.
بارش کے باعث للِہ تا جہلم ڈیول کیرج وے ایک بار پھر عوام کے لیے وبال جان بن گیا، وقفہ وقفہ سے جاری بارش کے بعد روڈ کی حالت انتہائی خراب ہو چکی ہے جس سے مسافروں سمیت ٹرانسپوٹرز حضرات کو شدید اذیت کا سامنا کرنا پڑ رہا ہے۔
محکمہ موسمیات کا کہنا ہے کہ بارش کا سلسلہ یکم اکتوبر تک جاری رہے گا۔
