سوہاوہ: وزیر مملکت برائے خزانہ و ریلوے بلال اظہر کیانی نے وزیراعلیٰ پنجاب مریم نواز شریف کے "رکاوٹوں سے پاک اور خوبصورت بازار” منصوبے کے تحت 10 کروڑ 92 لاکھ روپے کی لاگت سے مکمل ہونے والے سوہاوہ ماڈل بازار کا باقاعدہ افتتاح کر دیا۔
افتتاح کے بعد وزیر مملکت نے ماڈل بازار کا تفصیلی دورہ کیا اور وہاں پیدل چلنے والوں کے لیے تعمیر کیے گئے واک ویز، جدید سٹریٹ لائٹس، سیوریج سسٹم، نکاسیٔ آب اور دیگر ترقیاتی سہولیات کا جائزہ لیا۔ انہوں نے منصوبے کے معیار اور عوامی سہولیات کو بہتر بنانے کے اقدامات پر اطمینان کا اظہار کیا۔
اس موقع پر بلال اظہر کیانی نے کہا کہ وزیراعلیٰ پنجاب مریم نواز شریف کے وژن کے مطابق ضلع جہلم کے تینوں شہروں جہلم، دینہ اور سوہاوہ میں جدید ماڈل بازار قائم کیے جا رہے ہیں تاکہ شہریوں کو صاف، محفوظ اور سہولیات سے آراستہ کاروباری ماحول فراہم کیا جا سکے۔ انہوں نے بتایا کہ دینہ اور جہلم میں زیر تعمیر ماڈل بازاروں کے منصوبے بھی جلد مکمل کر لیے جائیں گے۔
بعد ازاں وزیر مملکت نے میونسپل کمیٹی ہال سوہاوہ میں کھلی کچہری کا انعقاد کیا، جہاں وزیراعلیٰ پنجاب کے مشیر صحت میجر جنرل (ر) ڈاکٹر اظہر محمود کیانی بھی ان کے ہمراہ موجود تھے۔
کھلی کچہری کے دوران بلال اظہر کیانی نے چھ گھنٹے سے زائد وقت تک شہریوں کے مسائل، شکایات اور تجاویز براہِ راست سنیں اور متعلقہ محکموں کے افسران کو موقع پر ہی ان کے فوری حل کے لیے ہدایات جاری کیں۔ انہوں نے کہا کہ عوامی مسائل کا بروقت ازالہ حکومت پنجاب کی اولین ترجیح ہے اور سرکاری اداروں کو عوام کی خدمت کو یقینی بنانا ہوگا۔
اس موقع پر ضلعی انتظامیہ، پولیس اور مختلف سرکاری محکموں کے اعلیٰ افسران بھی موجود تھے، جنہوں نے شہریوں کی شکایات کے ازالے اور حکومتی احکامات پر عملدرآمد کی یقین دہانی کرائی۔
