جہلم: وزیراعلیٰ پنجاب مریم نواز شریف کی زیر قیادت، وزیر لائیو سٹاک عاشق حسین کرمانی اور سیکرٹری لائیو سٹاک ثاقب علی عطیل کے ویژن کے تحت ضلع جہلم میں مویشی پال کسانوں کو وزیر اعلیٰ پنجاب لائیو سٹاک کارڈز کی تقسیم کا آغاز کر دیا گیا۔
لائیو سٹاک کارڈ تقسیم کرنے کی پروقار تقریب لائیو سٹاک کمپلیکس جہلم میں منعقد ہوئی، جس میں مہمان خصوصی وزیر اعظم کے مشیر برائے معیشت و توانائی اور رکن قومی اسمبلی بلال اظہر کیانی، ڈپٹی کمشنر جہلم میثم عباس، ایڈیشنل ڈائریکٹر لائیو سٹاک ڈاکٹر غلام مرتضیٰ ارشد، ڈپٹی ڈائریکٹر ڈاکٹر مسعود حسین، اور محکمہ لائیو سٹاک کی دیگر اہم شخصیات نے شرکت کی۔
تقریب میں میڈیا نمائندگان اور کارڈ سکیم کے تحت منتخب کسان بھی شریک تھے۔ تقریب میں ڈاکٹر غلام مرتضیٰ ارشد نے سکیم کے حوالے سے شرکاء کو بریفنگ دی۔
ڈپٹی کمشنر میثم عباس نے کارڈز کی افادیت اور شفافیت پر روشنی ڈالتے ہوئے کہا کہ پنجاب لائیو سٹاک کارڈ کسانوں کی زندگیوں میں مثبت تبدیلی لانے کا اہم ذریعہ ہوگا۔ پہلے مرحلے میں ضلع جہلم کے 97 کسانوں کو کارڈز فراہم کیے گئے ہیں، جن کے ذریعے وہ رعایتی نرخوں پر ونڈہ اور دیگر ضروری اشیاء خرید سکیں گے۔
رکن قومی اسمبلی بلال اظہر کیانی نے اس منصوبے کو کسانوں کی خوشحالی اور زرعی ترقی کے لیے سنگِ میل قرار دیا۔ انہوں نے کہا کہ زراعت اور لائیو سٹاک ہماری معیشت کا بنیادی ستون ہیں اور اس سکیم سے مویشی پال کسانوں کو براہ راست فائدہ ہوگا۔
انہوں نے محکمہ لائیو سٹاک کے عملے کی خدمات کو سراہتے ہوئے کہا کہ دودھ، گوشت، اور دیگر زرعی مصنوعات کی پیداوار بڑھانے اور برآمدات کے ذریعے زرمبادلہ کمانے میں یہ منصوبہ اہم کردار ادا کرے گا۔
تقریب کے اختتام پر بلال اظہر کیانی اور ڈپٹی کمشنر میثم عباس نے کامیاب کسانوں میں لائیو سٹاک کارڈز تقسیم کیے۔
اس موقع پر بلال اظہر کیانی نے کسانوں کو مبارک باد دیتے ہوئے کہا کہ حکومت کی کسان دوست پالیسیوں سے معیشت مستحکم ہو رہی ہے۔ آئندہ مراحل میں اس سکیم کے دائرہ کار کو مزید وسیع کیا جائے گا تاکہ زیادہ سے زیادہ کسان اس سے فائدہ اٹھا سکیں۔
