جہلم: پولیس نے احسن کارروائی کرتے ہوئے لاوارث حالت میں ملنے والی 20 سالہ لڑکی کو بحفاظت اس کے لواحقین کے حوالے کر دیا۔
ترجمان جہلم پولیس کے مطابق منڈی بہاؤالدین کی رہائشی 20 سالہ لڑکی گھریلو ناراضگی کے باعث گھر سے نکل کر جہلم آ گئی تھی۔ تھانہ کالا گجراں پولیس کو لڑکی لاوارث حالت میں ملی، جس پر پولیس نے فوری طور پر کارروائی کرتے ہوئے اس کے اہل خانہ سے رابطہ قائم کیا۔
پولیس نے تمام قانونی کارروائی مکمل کرنے کے بعد لڑکی کو بحفاظت اس کے اہل خانہ کے حوالے کر دیا۔ لواحقین نے بروقت مدد، بہترین تعاون اور ذمہ دارانہ کردار ادا کرنے پر جہلم پولیس کا شکریہ ادا کیا۔
ڈی پی او جہلم شفیق احمد چوہدری کا کہنا ہے کہ شہریوں کی جان و مال کا تحفظ پولیس کی اولین ترجیح ہے اور ایسے معاملات میں فوری اور مؤثر اقدامات یقینی بنائے جاتے ہیں۔
