دینہ: ڈسٹرکٹ پولیس آفیسر جہلم طارق عزیز سندھو کی زیر صدارت تھانہ منگلا کینٹ اور چوکی سٹی دینہ میں کھلی کچہریوں کا انعقاد کیا گیا، جس میں اہل علاقہ کی بڑی تعداد نے شرکت کی۔
عوامی مسائل سننے اور فوری داد رسی کے لیے منعقدہ ان کھلی کچہریوں میں شہریوں نے پولیس سے متعلقہ مختلف شکایات اور مسائل پیش کیے، جن پر ڈی پی او نے موقع پر ہی احکامات جاری کرتے ہوئے فوری کارروائی کی ہدایت کی۔
ڈی پی او طارق عزیز سندھو نے کہا کہ پبلک سروس ڈلیوری کے معیار کو بہتر سے بہترین بنانا جہلم پولیس کی اولین ترجیحات میں شامل ہے۔ انہوں نے واضح کیا کہ اگر کسی شہری کو مقامی پولیس کے رویے یا تفتیشی عمل سے متعلق کوئی شکایت ہو تو وہ بلا جھجک براہ راست مجھ سے رابطہ کرے، مکمل انصاف فراہم کیا جائے گا۔
ڈی پی او نے مزید کہا کہ آئی جی پنجاب اور آر پی او راولپنڈی ڈویژن کی ہدایات پر ضلع بھر میں کھلی کچہریوں کا انعقاد جاری ہے تاکہ فوری انصاف عوام کی دہلیز پر فراہم کیا جا سکے۔ اس مقصد کے لیے پولیس خدمت مراکز، تحفظ مراکز، میثاق سنٹرز، مصالحتی کونسلز اور تھانوں کو جدید سہولیات سے آراستہ کیا گیا ہے۔
چوکی سٹی دینہ میں منعقدہ کھلی کچہری میں بھی شہریوں کی درخواستوں کی سماعت کی گئی۔ ڈی پی او نے متعلقہ افسران کو سائلین کے مسائل کو ترجیحی بنیادوں پر حل کرنے کے سخت احکامات جاری کیے۔
ڈی پی او جہلم کے مطابق کھلی کچہریوں میں پیش کی جانے والی درخواستوں کا ریکارڈ آن لائن سسٹم کمپلینٹ مینجمنٹ سسٹم پر محفوظ کیا جاتا ہے اور مقررہ وقت میں فالو اپ لے کر شہریوں کو مطمئن کیا جاتا ہے۔ انہوں نے کہا کہ پولیس افسران کھلی کچہریوں میں عوام کے سامنے جوابدہ ہوتے ہیں اور ان کا مقصد صرف اور صرف تیز ترین انصاف کی فراہمی ہے۔
