پنڈدادنخان: نگہبان رمضان کارڈ کی ادائیگی کے دوران دھوکہ دہی سے رقم میں کٹوتی کرنے والے دو ملزمان کو پولیس نے گرفتار کر لیا۔
تفصیلات کے مطابق جہلم کی تحصیل پنڈدادنخان میں ایس ایچ او تھانہ جلالپور شریف اور ٹیم نے کارروائی کرتے ہوئے نگہبان رمضان کارڈ کی ادائیگی کے دوران دھوکہ دہی سے رقم میں کٹوتی کرنے والے کو حراست میں لے لیا اور ان کے خلاف مقدمہ درج کر کے مزید تفتیش کا آغاز کر دیا ہے۔ ملزمان سے مستحقین سے دھوکے سے حاصل کی گئی 2000 روپے رقم بھی برآمد کر لی گئی۔
پولیس کے مطابق ملزمان وزیر اعلیٰ پنجاب کی جانب سے جاری کردہ نگہبان رمضان کارڈ کے تحت امدادی رقم کی ادائیگی کے دوران مختلف حیلے بہانوں سے مستحق افراد کی رقم میں سے حصہ کاٹ لیتے تھے اور انہیں مکمل رقم فراہم نہیں کرتے تھے۔
اس حوالے سے ڈی پی او جہلم شفیق احمد چوہدری نے کہا ہے کہ سرکاری امدادی سکیموں میں بدعنوانی اور مستحقین کے استحصال کے خلاف سخت قانونی کارروائیاں عمل میں لائی جا رہی ہیں۔ انہوں نے واضح کیا کہ جہلم پولیس عوام کے حقوق کے تحفظ اور قانون کی بالادستی کے لیے ہر ممکن اقدامات جاری رکھے ہوئے ہے اور ایسے عناصر کے خلاف بلاامتیاز کارروائی کی جائے گی۔
