جہلم پولیس نے قمار بازی کے خلاف ایک اور بڑی کارروائی کرتے ہوئے 10 ملزمان کو گرفتار کر لیا۔ کارروائی کے دوران داؤ پر لگی رقم، موبائل فونز اور قمار بازی میں استعمال ہونے والے آلات بھی برآمد کر لیے گئے۔
تفصیلات کے مطابق ڈسٹرکٹ پولیس آفیسر جہلم طارق عزیز سندھو کی ہدایت پر ایس ایچ او تھانہ کالا گجراں اور ان کی ٹیم نے کامیاب کارروائی کرتے ہوئے قمار بازی کے اڈے پر چھاپہ مارا اور موقع سے 10 ملزمان کو حراست میں لے لیا۔
پولیس کے مطابق ملزمان کے قبضے سے داؤ پر لگی رقم 60 ہزار 150 روپے، 6 عدد موبائل فونز جن کی مالیت تقریباً 2 لاکھ 60 ہزار روپے اور قمار بازی کے مختلف آلات برآمد کیے گئے۔
ترجمان جہلم پولیس کے مطابق قمار بازی ایک معاشرتی لعنت ہے جو جرائم اور دیگر سماجی برائیوں کو جنم دیتی ہے، اس کے خاتمے کے لیے پولیس کی کارروائیاں بلاتفریق اور مسلسل جاری رہیں گی۔
ڈی پی او جہلم طارق عزیز سندھو نے کہا کہ معاشرتی جرائم کے خاتمے اور شہریوں کے پرامن ماحول کے تحفظ کے لیے پولیس پوری طرح متحرک ہے، قمار بازی، منشیات فروشی اور دیگر غیر قانونی سرگرمیوں میں ملوث عناصر کسی رعایت کے مستحق نہیں۔
