جہلم پریس کلب کے ممبر اور معروف سینئر صحافی سلطان امین زاہد کی رہائش گاہ محلہ اسلامیہ سکول میں حضرت مولا علیؑ کی شہادت کے سلسلہ میں دعائیہ تقریب اور افطاری کا اہتمام کیا گیا جس میں مختلف مکاتب فکر سے تعلق رکھنے والی سماجی، مذہبی اور صحافتی شخصیات سمیت شہریوں کی بڑی تعداد نے شرکت کی۔
اس موقع پر جہلم کی معروف سماجی و مذہبی شخصیت سید خلیل حسین کاظمی نے خطاب کرتے ہوئے کہا کہ 21 رمضان تاریخ اسلام کا عظیم اور المناک دن ہے جب باب العلم، فاتح خیبر اور خلیفہ چہارم حضرت علیؑ کو شہید کیا گیا۔ انہوں نے کہا کہ حضرت علیؑ کی پوری زندگی عدل، شجاعت اور حق گوئی کی روشن مثال ہے۔ آپؑ نہ صرف جلیل القدر صحابی تھے بلکہ علم، حکمت، بہادری اور انصاف کے اعلیٰ معیار کی علامت بھی تھے۔
انہوں نے مزید کہا کہ حضرت علیؑ نے اپنی ساری زندگی اسلام کی سربلندی، حق و سچ کی حفاظت اور مظلوموں کی مدد کے لیے وقف کیے رکھی اور ہر موقع پر عدل و انصاف کو مقدم رکھا۔ ان کی سیرت مبارکہ ہمیں صبر، برداشت، رواداری، بھائی چارے اور انسانیت سے محبت کا درس دیتی ہے۔
تقریب میں چوہدری عابد محمود، سید ذوالفقار حسین، مرزا جبار بیگ، ڈاکٹر اعجاز اعوان، عبدالرحمن قادری، ڈاکٹر آفتاب احمد، ملک شبیر اعوان، شبر حسین جنجوعہ، عبدالرحمن، حافظ ذوالقرنین احمد سمیت مختلف مکاتب فکر سے تعلق رکھنے والی مذہبی، سماجی، فلاحی اور صحافتی تنظیموں کے عمائدین نے شرکت کی۔
تقریب کے دوران حضرت مولا علیؑ کی سیرت، قربانیوں اور اسلام کے لیے خدمات کو خراج عقیدت پیش کیا گیا جبکہ ملک و قوم کی سلامتی، امن و استحکام اور امت مسلمہ کے اتحاد کے لیے خصوصی دعائیں بھی کی گئیں۔ بعد ازاں شرکاء کی تواضع افطاری سے کی گئی۔
میزبانی کے فرائض سینئر صحافی سلطان امین زاہد نے انجام دیے۔ اس موقع پر انہوں نے تقریب میں شرکت کرنے والے تمام معزز مہمانوں کا شکریہ ادا کرتے ہوئے کہا کہ ایسی روحانی و مذہبی تقریبات معاشرے میں بھائی چارے اور محبت کو فروغ دیتی ہیں۔
