پنڈدادنخان: پنشن کی عدم ادائیگی، میونسپل کمیٹی پنڈدادنخان کے ریٹائر ملازمین کا احتجاجی مظاہرہ کیا، احتجاجی مظاہرے میں تاجر برادری، سول سوسائٹی اور وکلاء نمائندوں نے شرکت کی۔
تفصیلات کے مطابق میونسپل کمیٹی پنڈدادنخان کے درجنوں ریٹائر ملازمین نے پنشن کی عدم ادائیگی کے خلاف نوازش شہید چوک میں احتجاجی مظاہرہ کیا، مظاہرے میں تاجر، سول سوسائٹی اوروکلاء کے نمائندوں نے شرکت کی۔
ریٹائر ملازمین کا کہنا تھا کہ پانچ پانچ ماہ سے پنشن کی ادائیگی نہیں کی گئی جس کے باعث فاقہ کشی پر مجبور ہیں، ساری زندگی ادارے کی خدمت کی ہے۔ وزیر اعلی پنجاب مریم نواز میونسپل کمیٹی کی حالت زار پر خصوصی توجہ دیں اور ریٹائر ملازمین کے بقایا جات ادا کیے جائیں۔
ریٹائر ملازمین کا کہنا تھا کہ اگر 11 مارچ تک بقایا جات ادا نہ ہوئے تو اسسٹنٹ کمشنر آفس کے سامنے احتجاجی دھرنا دیا جائے گا۔
مرکزی انجمن تاجراں کے صدر چوہدری زبیر جمیل، معروف سماجی شخصیت ملک غلام مصطفی، چوہدری ارشد، حاجی محمد اسلم، صابر راہی نے اپنے خطاب میں ملازمین سے اظہار یکجہتی کا اظہار کرتے ہوئے پنجاب حکومت سے بقایا جات کی ادائیگی یقینی بنانے کا مطالبہ کیا۔
