سوہاوہ کے علاقے موضع نلہ میں مقامی آبادی کو صاف اور معیاری پینے کے پانی کی فراہمی کے لیے فلاحی کمیٹی مجاہد آباد جہلم کے زیرِ اہتمام واٹر فلٹریشن پلانٹ نصب کرکے باقاعدہ افتتاح کر دیا گیا۔
واٹر فلٹریشن پلانٹ کا افتتاح علیم یوسف ڈپٹی ڈائریکٹر سوشل ویلفیئر ڈیپارٹمنٹ جہلم نے کیا۔ اس موقع پر فلاحی کمیٹی مجاہد آباد کے صدر چوہدری رشید احمد، کمیٹی کے اراکین، مخیر حضرات، ڈونر عقیل یوسف اور ان کے خاندان سمیت مقامی کمیونٹی کے افراد بھی موجود تھے۔
اس موقع پر گفتگو کرتے ہوئے ڈپٹی ڈائریکٹر سوشل ویلفیئر ڈیپارٹمنٹ جہلم علیم یوسف نے کہا کہ مقامی آبادی کو درپیش صاف پینے کے پانی کی مشکلات کو مدِنظر رکھتے ہوئے فلاحی کمیٹی مجاہد آباد کی جانب سے واٹر فلٹریشن پلانٹ کی تنصیب ایک اہم اور قابلِ تحسین فلاحی کاوش ہے۔
انہوں نے کہا کہ اس منصوبے سے علاقے کے مکینوں کو صاف اور معیاری پینے کا پانی میسر آئے گا، جو مقامی آبادی کے لیے ایک بنیادی ضرورت کی فراہمی میں اہم پیش رفت ہے۔
افتتاحی تقریب کے موقع پر شرکاء نے فلاحی کمیٹی مجاہد آباد صدر چوہدری رشید احمد، ڈونر عقیل یوسف اور ان کے خاندان کا خصوصی شکریہ ادا کرتے ہوئے کہا کہ واٹر فلٹریشن پلانٹ کی تنصیب علاقے کی فلاح و بہبود کے لیے ایک اہم سنگِ میل ہے۔
شرکاء نے اس فلاحی منصوبے کو مقامی آبادی کے لیے مفید اقدام قرار دیتے ہوئے فلاحی کمیٹی اور ڈونر خاندان کی کاوشوں کو سراہا۔
