جہلم پولیس نے ایمرجنسی 15 پر موصول ہونے والی کال پر فوری کارروائی کرتے ہوئے سکوٹی بائیک پر جانے والی لڑکیوں کو ہراساں کرنے اور نازیبا حرکات کرنے والے دو ملزمان کو قلیل وقت میں گرفتار کر لیا۔
پولیس کے مطابق اطلاع ملتے ہی پولیس ٹیم فوری طور پر موقع پر پہنچی اور دونوں ملزمان کو حراست میں لے لیا۔
ملزمان کے خلاف خواتین کو ہراساں کرنے اور نازیبا حرکات کرنے کے الزامات کے تحت مقدمہ درج کر لیا گیا ہے جبکہ مزید قانونی کارروائی اور تفتیش جاری ہے۔
پولیس حکام کا کہنا ہے کہ واقعے کے تمام پہلوؤں کو میرٹ پر مکمل کیا جائے گا تاکہ ملزمان کو قانون کے مطابق قرار واقعی سزا دلائی جا سکے۔
ڈی پی او جہلم شفیق احمد چوہدری نے کہا کہ شہریوں خصوصاً خواتین کے تحفظ کو یقینی بنانے کے لیے زیرو ٹالرنس پالیسی کے تحت سخت اقدامات جاری ہیں اور قانون کی خلاف ورزی کرنے والوں کے خلاف بلاامتیاز کارروائی عمل میں لائی جائے گی۔
