پنڈدادنخان: منشیات فروش کو جرم ثابت ہونے پر 9 سال قید اور جرمانے کی سزا سنا دی گئی۔
تفصیلات کے مطابق جہلم کی تحصیل پنڈدادنخان میں تھانہ پنڈدادنخان کے منشیات مقدمہ نمبر 520/24 بجرم CNSA 9(1)3B میں عدالت نے فیصلہ سنا دیا۔ عدالت نے منشیات فروش محمد منظور سلطان کو جرم ثابت ہونے پر 9 سال قیدِ سخت اور 1 لاکھ روپے جرمانے کی سزا سنائی ہے۔
مجرم منظور سلطان کو سال 2024 میں منشیات فروشی کے سنگین جرم میں گرفتار کیا گیا تھا۔ جہلم پولیس نے پیشہ ورانہ مہارت کا مظاہرہ کرتے ہوئے مجرم کو ٹریس کر کے گرفتار کیا اور ٹھوس شواہد کے ساتھ مقدمے کا چالان عدالت میں پیش کیا۔ کیس کی موثر پیروی کے نتیجے میں معزز عدالت نے مجرم کو قرار واقعی سزا سنائی۔
ڈی پی او جہلم طارق عزیز سندھو نے کہا کہ منشیات فروش معاشرے کا ناسور ہیں اور ان کے مکمل خاتمے کے لیے بھرپور آپریشن جاری رکھا جائے گا۔ انہوں نے انوسٹی گیشن اور لیگل ٹیم کی شاندار کارکردگی کو سراہتے ہوئے ٹیم کو تعریفی اسناد اور نقد انعام دینے کا اعلان بھی کیا۔
