جہلم میں شہری نقل و حمل کے شعبے میں ایک اہم اور تاریخی قدم اٹھاتے ہوئے وزیراعلیٰ پنجاب کے وژن اور پاکستان مسلم لیگ (ن) کے مرکزی رہنما، ممبر قومی اسمبلی و وزیر مملکت ریلوے و خزانہ بلال اظہر کیانی کی کوششوں سے جدید اور ماحول دوست الیکٹرک بس سروس کا باقاعدہ افتتاح کیا جا رہا ہے۔
یہ منصوبہ نہ صرف شہری سفری سہولیات کو جدید اور معیاری بنائے گا بلکہ صاف ستھرا اور پائیدار ماحول فراہم کرنے میں بھی معاون ثابت ہوگا۔ الیکٹرک بس سروس کی افتتاحی تقریب 29 دسمبر بروز سوموار، دن 12 بجے جہلم جادہ کے مقام پر منعقد ہوگی، جس میں صوبائی حکومت کی اہم شخصیات شرکت کریں گی۔
افتتاحی تقریب میں مہمانِ خصوصی و معزز شرکاء میں مشیر صحت پنجاب میجر جنرل (ر) ڈاکٹر اظہر محمود کیانی، وزیر مملکت برائے خزانہ و ریلوے بلال اظہر کیانی، وزیر ٹرانسپورٹ پنجاب بلال اکبر اور وزیر صحت پنجاب خواجہ سلمان رفیق شامل ہوں گے۔ افتتاح کے بعد تمام معزز مہمان جدید الیکٹرک بس میں سوار ہو کر گورنمنٹ کمپری ہینسو ہائی اسکول تک خصوصی سفری دورہ کریں گے، جو اس سروس کے باقاعدہ اور عملی آغاز کی علامت ہوگا۔
اس منصوبے کے تحت شہریوں کو آرام دہ، محفوظ اور معیاری سفری سہولیات فراہم کی جائیں گی۔ ماہرین کے مطابق الیکٹرک بس سروس نہ صرف شہریوں کے لیے پرسکون اور جدید سفری نظام مہیا کرے گی بلکہ ماحولیاتی آلودگی میں بھی نمایاں کمی لائے گی، جس سے جہلم شہر کے شہری ڈھانچے میں مثبت اور دیرپا تبدیلی متوقع ہے۔
