جہلم کے علاقے بالا بھٹیال میں سی سی ڈی اور مسلح ملزمان کے درمیان مبینہ پولیس مقابلے کے دوران ایک خطرناک اور ریکارڈ یافتہ ملزم ہلاک ہو گیا، جبکہ اس کے دیگر ساتھی فرار ہونے میں کامیاب ہو گئے۔
ترجمان کے مطابق سی سی ڈی کو اطلاع موصول ہوئی تھی کہ مطلوب ملزم جہانزیب خان اپنے ساتھیوں کے ہمراہ علاقے میں موجود ہے، جس پر قانون نافذ کرنے والے اداروں نے کارروائی کرتے ہوئے مذکورہ مقام پر چھاپہ مارا۔
ترجمان کا کہنا ہے کہ چھاپے کے دوران ملزمان نے پولیس ٹیم کو دیکھتے ہی فائرنگ شروع کر دی، جس کے نتیجے میں فائرنگ کا تبادلہ ہوا۔ کارروائی کے دوران ملزم جہانزیب خان ہلاک ہو گیا جبکہ اس کے دیگر ساتھی موقع سے فرار ہونے میں کامیاب ہو گئے۔
ترجمان کے مطابق ابتدائی تحقیقات سے معلوم ہوا ہے کہ جہانزیب خان چوری، ڈکیتی اور دیگر سنگین جرائم میں ریکارڈ یافتہ ملزم تھا اور قانون نافذ کرنے والے اداروں کو مختلف مقدمات میں مطلوب تھا۔
ترجمان نے مزید بتایا کہ ملزم جہانزیب خان اپنے ہی ساتھیوں کی فائرنگ کی زد میں آ کر ہلاک ہوا، جبکہ فرار ہونے والے ملزمان کی گرفتاری کے لیے مختلف مقامات پر چھاپے مارے جا رہے ہیں۔
واقعے کے بعد علاقے کو گھیرے میں لے کر شواہد اکٹھے کیے گئے جبکہ مزید قانونی کارروائی اور تفتیش جاری ہے۔
